کابل ټکی کام (دوشنبه، ۶ زمری، ۱۴۰۴ل)
د یمني ځواکونو ویاند “جنرال یحیی سریع” په خپره کړې خبر پاڼه کې ویلي، چې د فلسطین په اشغال شوې سیمه، په ځانګړې توګه د غزې په تړانګه کې د روانو قتل عامونو او د نړیوالو د سکوت له امله، یمني ځواکونه اړ شوي چې د صهیونیستي رژیم پر وړاندې خپلې عملیاتې کړنې لا پسې پراخې کړي.
د خبر پاڼې له مخې، د یمن پوځ د سمندري محاصرې څلورمه مرحله اعلان کړې ده. په دې مرحله کې به د هغو ټولو شرکتونو کښتۍ په نښه کېږي چې اسرائیلو سره سوداګریزې اړیکې لري.
یمني ځواکونو خبرداری ورکړی، چې له دې اعلان وروسته هره هغه کښتۍ چې د صهیونیستي رژیم له بندرونو سره راکړه ورکړه کوي، د دوی د توغندیو او بېپیلوټه الوتکو هدف به ګرځي.
خبر پاڼه کې راغلي: د یمن د وسلهوالو ځواکونو دغه عملیات به تر هغې دوام لري، تر څو چې د غزې محاصره او بریدونه نه وي درېدلي.
یمني ځواکونه ټینګار کوي چې دا اقدام د فلسطین د مظلوم ولس د ملاتړ لپاره د دیني، انساني او اخلاقي مسؤولیت له مخې ترسره کېږي.
