کابل ټکی کام (دوشنبه، ۶ زمری، ۱۴۰۴ل)
د کرنې، اوبو لګولو او مالدارۍ وزارت مرستیال مولوي صدراعظم عثماني وايي، چې په تېر یوه کال کې د کرنې پراختیا صندوق له لارې بزګرانو، مالدارانو او خصوصي سکتور ته ۱.۴ میلیارده افغانۍ د اسلامي مالي تمویل په چوکاټ کې ورکړل شوې دي.
نوموړي دا څرګندونې د وزارت د یو کلنو لاستهراوړنو د تشریح پروګرام کې وکړې او زياته يې کړه چې تېر کال هېواد کې ۴۳ زره متریک ټنه اصلاح شوي غنم، سلګونه ټنه نور تخمونه او کیمیاوي سرې بزګرانو ته وېشل شوې دي.
همداراز، له ۱۱ ولایتونو څخه ۳۸ زره ټنه اضافي غنم د ۱ میلیارد افغانیو په ارزښت اخیستل شوي، چې د وچکالۍ، بازار ثبات او ترویجي پروګرامونو برخه وه. له دې لارې ۱۱ زرو کسانو ته لنډمهاله کاري زمینه هم برابره شوې ده.
د کرنې وزارت چارواکو وویل، چې افغانستان هر کال له ۸ میلیونه ټنه ډېرو غنمو ته اړتیا لري، چې یوازې نږدې نیمایي یې دننه تولیدېږي. خو د دوی په وینا، هڅې روانې دي، څو هېواد په راتلونکو څلورو یا پنځو کلونو کې د غنمو په برخه کې ځانبساینې ته ورسېږي.
