کابل ټکی کام (پنجشنبه، ۳۰ زمری، ۱۴۰۴ل)
د افغانستان لپاره د امريکا پخواني استازي زلمي خلیلزاد هغو افغانانو ته چې د آیاېسآی یوې ادارې لهخوا اسلاماباد ته د یوې غونډې لپاره وربللي په خپل پيغام کې ويلي، چې د آیاېسآی هدف د افغانستان خپلواک، متحد او پیاوړی کېدل نه دي، بلکې برعکس پلانونه لري.
خليلزاد زياته کړې، د دې ادارې تېره سابقه په افغانستان او پاکستان کې روښانه ده، نو افغانان باید په ډېر احتیاط پرېکړه وکړي.
هغه څرګنده کړې، چې څو افغانانو ورته ویلي، د شفافیت نشتوالي له امله یې دا بلنه رد کړې ده.
نوموړي ویلي، چې د افغانانو د عقایدو او اندېښنو درناوی کوي او په ډېرو مواردو کې ورسره همنظر دی.
خلیلزاد پوښتنه کړې، چې د دې کنفرانس لګښت څوک ورکوي او کومې پټې موخې لري؟ نوموړي زیاته کړه، چې دا ډول مشکوکې غونډې د وطندوستو افغانانو لپاره مناسب ځای نه دی او ښه ده چې په خپلواک ډول بل ځای کې غونډې تنظیم کړي.
