فلسطيني ملت له څو لسيزو راهيسې د حريت او ازادۍ لپاره د صهيونيستي رژيم پر وړاندې بې سارې مبارزه کړې او په دې برخه کې يې خورا ډیرې قربانۍ ورکړي دي، د ۲۰۲۳کال د اکتوبر مياشتې له اوومې نیټې وروسته د يو لوی او مهم هدف لپاره د فلسطيني ملت قربانۍ نورې هم ډېرې شوې او اوس هره ورځ ګڼ شمېر بې ګناه فلسطينيان د صهيونيستي اشغالګرو په ړندو بمباردونو او لوږې له امله ساه ورکوي.
د نيلسن منډيلا لمسي وروستۍ څرګندونې، چې د غزې د محاصرې د ماتولو لپاره د روانې قافلې غړی دی، نړۍ ته یو ښکاره پیغام لري: فلسطیني ولس نن د هغه څه ښکار دی چې د جنوبي افریقا خلک يې د نژادي توپیر او تبعیض له مخې کلونه کلونه وځورول، خو د فلسطینیانو حالت لا پسې سخت دی، د نوموړي په خبره، دا د يوه ملت سياسي دعوه نه، بلکې د ټول بشریت د وجدان موضوع ده.
جنوبي افریقا د نړۍ په تاریخ کې د مقاومت او آزادۍ اوږد او له کړاوونو ډک داستان لري. د نژادي توپیر پر وړاندې د ولس کلونه کلونه مبارزه، زندانونه، شکنجې او قربانۍ بالاخره د نيلسن منډيلا په رهبرۍ د آزادۍ په لمر بدلې شوې. منډيلا موږ ته وښوده چې که ظلم هرڅومره اوږد شي، د ملتونو د آزادۍ داعيه له منځه نشي وړلی. د هغه ژوند د دې خبرې څرګند ثبوت دی چې د عدالت د لټون کاروان، که هر څومره ځنډېدلی هم وي، بالاخره منزل ته رسېږي.
نن ورځ فلسطیني ولس هماغه تجربه بیا تکراروي، خو په لا سختو شرایطو کې. د محاصرې تر سیوري لاندې، د بې ځایهکولو تر کړاوونو، د اقتصادي تنگلاسۍ او د هره ورځي بریدونو تر ګواښ لاندې، د دوی ژوند د یوې لویې بشري فاجعې بڼه غوره کړې ده. د هغوی ماشومانو ته د عادي ژوند مفکوره هم یوازې یو خوب ښکاري.
د منډيلا د کورنۍ غړي خبرې موږ ته رايادوي چې د فلسطین قضیه یوازې د خاورې یا سیاست موضوع نه ده، بلکې د نړیوالې ټولنې د انصاف او انسانیت ازموینه ده. نړۍ چې د جنوبي افریقا د ولس ترڅنګ ودرېده او د نژادي توپیر تیاره یې ماته کړه، نن هم باید د فلسطین ترڅنګ ودرېږي، څو هغوی هم آزاد او له کرامت ډک ژوند ولري.
ازادي يو خدای ورکړی حق دی، فلسطينيان د همدې فطري او مشروع حق لپاره قربانۍ ورکوي، شپه که هر څومره اوږده شي، په پای کې سپينه سبا راخيږي، کټ مټ همداسې به يوه ورځ ان شاء الله تعالی فلسطيني ملت د يو خپلواک دولت څښتن شي، خو که نړۍ همداسې چپ او لاس تر زنې کښيني، تاريخ به يې جفا هيڅکله هيره نه کړي.
