کابل ټکی کام (چهارشنبه، ۲ تله، ۱۴۰۴ل)
د قرغزستان ولسمشر صدر جباروف د ملګرو ملتونو د اتیایمې عمومي غونډې په وینا کې له نړیوالې ټولنې غوښتي چې د افغانستان کنګل شوې شتمني ازادې کړي.
نوموړي ویلي، د افغانستان نړیواله انزوا او د مالي مرستو بندېدل د منلو وړ نه دي.
جباروف ټینګار کړی، چې نړیواله ټولنه باید د افغانستان د اقتصادي او بشري وضعیت د ښهکولو لپاره عملي ګامونه پورته کړي په خبره يې د افغانانو له حقه شتمنۍ محرومول د دغه هېواد د کړکیچ د لا ژورتیا لامل ګرځي.
یاده غوښتنه داسې مهال کېږي چې له دې وړاندې چین، روسیې او ملګرو ملتونو هم د افغانستان د شتمنۍ د آزادېدو غوښتنه کړې وه.
د امریکا له لوري له تېر حکومت وروسته شاوخوا ۱۰ میلیارده ډالر د افغانستان د بانک مرکزي شتمنۍ کنګل شوې دي، چې اسلامي امارت څو ځله د هغې د بېرته ورکولو غوښتنه کړې ده.
