کابل ټکی کام (پنجشنبه، ۱۱ مرغومی، ۱۴۰۴ل)
د پښتون ژغورنې غورځنګ (PTM) مشر منظور پښتین وايي، ۲۰۲۵ کال د پنجابي ریاست د سختو تګلارو له امله پر پښتنو ډېر زیانمن او ویرجن تېر شو.
نوموړي په خپله رسمي فېسبوک پاڼه کې لیکلي، چې د پښتونخوا په ګڼو غرنیو سیمو کې پر ولسي وګړو ډرون بریدونه، هاوان توغندي، جېټ بمبارۍ، ځمکني ماینونه او هدفي وژنې شوي او ښځې، ماشومان او سپینږیري هم له تاوتریخوالي خوندي نه وو.
پښتین زیاته کړې، چې د PTM پر غړو او مشرانو پرلهپسې چاپې، نیونې او لادرکه کېدل روان دي، ګڼ ملي شخصیتونه وژل شوي او لا هم یو شمېر فعالان د پاکستاني ادارو له خوا بېدرکه دي.
د هغه په وینا، په ۲۰۲۵ کال کې د تیراه، چارمنګ، میرعلي او جانيخېل سیمې نږدې هره ورځ د بریدونو لاندې وې او د تورخم او چمن په لارو کې هم پښتانه کورنۍ په زور ایستل شوې دي.
د PTM مشر ټینګار کړی، چې سره له ټولو فشارونو غورځنګ خپلې مبارزې ته دوام ورکړی او د ملت له ملاتړ سره به یې ژوندۍ ساتي.
هغه ویلي، چې بدلون پرلهپسې محنت غواړي او د پروپیګنډو پر ځای باید د همت او زغم له لارې مبارزه پیاوړې شي، او له الله تعالی یې د نور همت او حوصلې دعا کړې ده.
