د ښوونې او روزنې وزارت ته تړلي ښوونځي نه ښکاري
« تبصره »
د ښوونې او روزنې وزارت رسنيو ته ويلي ، چې د هېواد په بېلا بېلو ولايتونو کې يې ښونځيو کې زده کونکي په زده کړو بوخت دي ، چې ورسره په ننګرهارولايت د شينوارو اچين ولسوالۍ د ښونځيو راپور درې څلور ځلې رسنيو کې خپور کړ.
په هېواد کې ، چې زده کړې لپاره د ودانۍ يوه خښته ايښودل کېږي يا يو زده کونکی په زده کړه بوخت شي خو ښې پرې بايد وښودل شي ؛ ځکه علم يوازې د خپل هېواد نه ؛ بلکې د نړۍ په بدلون کې مرسته کوي ، چې ښکاره مثالونه يې وليدل شول.
د ښوونې او روزنې وزارت بايد د څو ولايتونو په پرانيستو ښوونځيو کې د زده کړو يادونه وکړي د خپل وزارت په لاس لاندې کارونو او پروګرامونو کې بايد د تړلو ښونځيو په اړه لازم تصاميم ونيسي او د تړل شويو ښوونځيو پرانستنې ته لومړيتوب ورکړي.
د ښوونې او روزنې وزارت بايد يوازې په پنجشير او باميان حساب ونه کړي ، چې په ښوونځيو کې يې هلکان او نجونې په درس ويلو بوخت دي.
د ښونې او روزنې وزارت د پکتيا ، فراه ، فارياب او هرات ، لري پرتو ولسواليو او هم د ننګرهار د اچين او هسکې مينې ولسواليو د تړل شويو ښوونځيو په اړه لاس په کارشي ، چې د اچين ولسوالۍ او ورسره په نورو ولسواليو کې اوس هم له پرانيستو ښوونځيو د تړل شويو ښونځيو شمېره زياته ده.
د ښوونې او روزنې وزارت بايد د خيالي پوليسو په څېر د خيالي ښوونځيو پلټنې هم وکړي ، چې زده کوونکو کتابونه او د استاذانو معاشونه له وزارته په خپل وخت اخلي.
په هېواد کې ورځ په ورځ د بې سېوادۍ د کچې په اړه اندېښنې زياتېږي او دا اندېښنې په ځای دي ، چې ولسمشر اشرف غني ښوونځيو ياتعلمي نوي کال زنګ وواهه ؛ په همدې نوي کال کې د زده کړې ناورين زوړ او په خپل ځای پاتې دی.
په هر هېواد کې ، چې د افغانستان په څېر قانون ماتېږي، اداري فساد له يوې ورځې بلې ورځي ته زياتېږي ، نا امني تر کليو په ښاورو کې زياته ليدل کېږي ، د ځمکو غصب د پخوا په څېر روان وي ، د تعلمي نوي کال زنګ به يې ووهل شي ؛ خو ياد ناورين په زوړ حالت پاتې وي.
د ښووني وزارت ته دکاميابۍ ډېره فاصله پاتې ده ، چې دا فاصله په عمل رالنډېږي نه په مطبوعاتي غونډو کې رسنيو ته د څو ښوونځيو د پرانيستلو په يادونو.
تر څو چې زموږ ولس په علمي کچه ډاډ من نشي ځوان نسل به يې دبې روزګارۍ له امله د يونان او د ترکيې په اوبوکې د کبانو خوراک وي.
