د سولې شورا بيا پرسولې شخوند پېل کړ!

« سرليکنه »

د تېر ۲۰۱۵ کال په ورستيو کې تر يوه کال ځنډ وروسته د اسيا زړه کنفرانس کې ، چې په اسلام آباد کې جوړ شوی و او د هېواد ولسمشر اشرف غني پکې په نيم زړه ګډون وکړ، د سولې د هلو ځلو د پېل لپاره بيا ژمنې وشوې ، چې بالاخره د څلور اړخېزو غونډو ؛ امريکا ، پاکستان ، چين او افغانستان لړۍ پېل شو ؛ خو د ويناو او د ژمنو سره سم يې څه نتېجه ترلاسه نه شوه.

 اشرف غني ته د هېواد يو شمېر علماوو لخوا د سولې د شورا له ميکانيزمه شکايتونه شوي وو ، چې اشرف غني پکې غوڅ بد لون را وست او څو کسه ناراضيان يې د سولې د شورا په نامه ، چې له بهره ورته بيا ډالري بودېجه ورکړل شوې ؛ معرفي کړل چې په دې شورا  کې هم د خبرو کولو او طالبانو ته قناعت ورکولو څوک نه ليدل کېږي.

 د استاد برهان الدين رباني او د هغه د ځوی صلاح الدين رباني په څېر د سولې د شورا نوی رئيس پيرسيد احمد ګيلاني ورسره د ټول ټيم لخوا د ايران د ولسمشر حسن روحاني په وينا ، چې د سولې په اړه يې په اسلام اباد کې وکړه په هغې اوس د سولې د شورا لخوا شخوند وهل پېل شول.

 خپله پيرسيد احمد ګيلاني داحترام وړ دی، د يوه جهادي مشر په صفت يې ټول ولس د یته قانع دی ، چې د واک او قدرت لپاره يې د چا وينه نه ده تويه کړې ؛ خو د سولې د شورا لپاره يوه  داسې شخص ته اړتيا ده ، چې په نړيواله کچه سياسي لوبيدلی او خوله ور انسانان وي څو طالب مشران دې ته قانع کړي ، چې په سوله کې يوازې د افغان ولس نه ؛ بلکې د ګاونډيانو او هم د سيمې د هېوادونو ګټه ده.

 د طالبانو سره د خبرو د مخه دا زمينه برابره کړي چې کوم شرطونه طالبان يادوي هغه يې له مخه پوره کړي وي او هم د طالبانو هرې غوښتنې ته قانع کوونکی ځواب ووايي؛ بيا خو طالبان چې جګړې ته دوام ورکوي او ځانونه وژني د همدې ولس ، نظام ، قانون او پر هېواد د يرغلګرو خلاف په مبارزه کې يې وژنې، په شخصي ډول خو د طالبانو او د ملي يوالي د حکومت تر منځ کومه دښمني نشته .

 طالبان هم د سولې ليواله دي ؛ خو د يوې داسې سولې ، چې په هغې کې د اسلامي مقدساتو ، افغاني کلتور او د جهاد په دوران کې د شهيدانو د قربانيو او ارمانونو مطابق اصول خوندي وساتل شي،  د طالبانو د مشرانو د ويناو  او معلوماتو له مخې دوی هغه ډول سوله کوي ، چې د افغان ولس ګټې پکې په نظر کې ونيول شي نه د يرغلګرو او د سيمې د لاس وهونکو هېوادونو ګټې.

د حکومت او طالبانو ترمنځ ، چې سوله وځنډيده پکې يرغلګر ، د افغانستان سره مرسته کوونکي د سيمې او ګاونډيو هېوادونو ټولو خپلې ګټې په نظرکې نيولي ، د دې سولې لپاره د ټولو ګټو د نيولو هېوادونو لپاره سياسي مفکوره پکار ده نه دا ، چې د حسن روحاني په وينا شخوند ووهي ، حسن روحاني ويلي ، چې ايران دې هم د سولې بهير کې ورګډ کړای شي.