ویاړمنې څهرې
ابوبلال انوري
ترداره لاړم خو انکار مې په ضمیر کې نه و
ځکه چې دا مې په تګلاره د امیر کې نه و
ډیرې مودې وشوې منصوربه چاته نه وي په یاد
دچا په خیال دچا په خوب دچا تعبیر کې نه و
په ویاړ ورځمه او رسۍ د دغه دار ښکلوم
همت یئ پاتې په زندان او په زنځیر کې نه و
زه د تاریخ زرینه پاڼه شوم د دار په ختو
خو دغه ویاړ راته دفکر په تغیر کې نه و
ګورئ چې ساندې اوسلګۍ راباندې ونه هئ
ماته سکون د دار په سر وشو په ویر کې نه و
ماخپل مرګي ته هرکلی د دار په سر وکړو
خو له پاک هدفه انحراف مې په مسیر کې نه و
زه د ملت په خپلواکۍ او ازادۍ مئین ؤم
له امن پرته مې نور هیڅ هم په تدبیر کې نه و
نو (انوري) به څنګه نه ویاړم په داسې زلمو
سکون مسکاوه پښیمانه په تصویر کې نه و
