په تیر پسې……..
په غونډه کې ټولو سردارانو په خپلو خپلو لاسو بښنلیکونه و لیکل او میرزاخان ته یی ورکړل، میرزاخان د یوې لمحې لپاره هم ځنډ ونکړ او ټول بښنلیکونه یې راټول او له ځانه سره یې د ارکاټ په لور یوړل.
شهزاده ټیپو ته تیره شپه بلکل خوب ورنغی، هغه به کله د خیمې څخه بیرون اوکله د خیمې په دننه کې ګرزیدو راګرزیدو او په دې توګه یې شپه سبا کړه.
هسې خو هغه دا تیرې څو شپي ټولې په بې خوبۍ کې تیرې کړې وې خو دې شپې هغه ډېر زیات نا ارامه کړی وو. هغه به خپل دغه آند ډېر اندیښمند کاوه چې:
خداي خبر، هغه خلک به څوک وي چې زه یې له سترګو غورځولی یم او زما په ځای یې زما کشر ورور د میسور په تخت کینولی دي؟
« درنه شهزاده! د سرنګاپټم څخه میرزا خان راغلی او ستاسې سره د لیدو شرف تر لاسه کول غواړي.» یو ساتونکی یې خیمې ته راننوت او په ډېر آدب سره یې داخبره وکړه. دې خبرې د شهزاده ټيپو د خیالاتو لړۍ پرې کړه، د شهزاده تندی و غځید، خو خپل ځان یې په کابو کې کړ او ویې ویل :
«مهامیرزاخان ته اجازه ورکړئ چې راشي .»
میرزاخان د ورننوتلو سره سم شهزاده ته سلام او درنښت وکړ، بیا یې لاسونه په سینه کیښودل او ودرید. شهزاده انتظار کاوه چې شاید میرزاخان پخپله څه ووایي خو هغه چپ چاپ ولاړ وو . په دې وخت کې شهزاده خپل سکوت مات کړ او ویې ویل:
«میرزاخانه! دلته ښه راغلاست، وایه څنګه راغلي یاست ؟ »
میرزاخان په ژړغوني اواز ځواب ورکړ چې:
« درنه شهزاده! ما او ټولو امراو چې همدا اوس په سرنګاپټم کې سره راټول شوي دي یوه اضطراري او سیاسي غلطي کړیده. دلته د هغې غلطۍ د بښني د غوښتلو له پاره راغلی یم. »
د شهزاده په مخ باندي دخوشحالۍ نښې را وځلیدې :
«هغه غلطي خو به کوم علت او کوم مجوز هم لري؟» شهزاده په ډیره ډاډمنه توګه ترې و پوښتل .
«درنه شهزاده! » میرزاخان په داسي حال کي چې خپل ځان یی راټولوو، په خبرو پیل وکړ: «د سرنګاپټم آمیرانو ته دا اندیښنه پیدا شوې وه چې د ستاسې د دروند پلار د وفات نه وروسته، چې خبر یې هرې لورې ته خپور شوی وو او تاسې دروند شهزاده ته یی هم خبر درلیږل شوی وو. خو ستاسو ځنډوونکی راتګ د فوځ جنرالان او د دولت مسؤلین وارخطا کړي وو چې هسې نه چې د سلطنت بدخواه د میسور د تخت وتاج له پاره کورني اختلافات راپيدا کړي او په دې توګه په سرنګاپټم باندې یرغل راوړي، په دې اساس آمیرانو او سردارانو پریکړه وکړه چې په موقتي توګه شهزاده کریم د مصلحت لپاره په تخت کینوي، خو سرنګاپټم ته ستاسي دراتګ نه وروسته به شهزاده کریم د تخت نه لاس اخلي ..»
شهزاده ټیپو تر ډیره پورې په فکر کې ډوب وو، وروسته یی یوه اوږده ساه واخسته او ویې ویل چې: « په دې اړه نورو سردارانو څه ډول پریکړه کړې ده …»
نور بیا……….
