کابل غږ
له څه وخت نه چې په افغانستان کې دجګړې اور بل شوی دی، افغانان د بې ځالې مرغانو په څېر په یو او بل هېوادکې شپې سباکوي او کوم چې له ګاوانډیو هېوادونو له هجرت څخه راستانه شوي دي، دکورنیو جګړو له امله له خپلوکورونو نورو ولایتونو او ولسوالیو ته کډه شوي نو د بې ځالې مرغانوپه څېر په کډوالۍ کې وخت تیروي، چې تر اوسه پورې د دې بې ځالې مرغانو دخپلو کورونو د ابادولو او په خپلو سیمو کې د اوسیدو لپاره یو واکمن هم په خپله واکمنۍ کې قدم پورته نه کړو.
د اسلام په مبارک دین، بشري قوانینو، انساني ټولنواو هر هېواد کې ظلم، ناروا، د بې ګناه انسانانو وژنه، په ظلم او زور سره نیول او زندانونو ته اچول، په زندانونوکې له بندي په زور د یو جرم پړه او اقرار اخیستل او دیته ورته نور غیرانساني اعمال هر وخت ناروا او باید په هېواد کې ېې چارواکي، مخور، زورور،خوله ور او ژبه ور اشخاص مخه ونیسي، دخپل مسئولیت په اساس باید پر دولت او په ظلم کې ښکیلو لوریو باندې غږ وکړي، چې ظلم هر وخت ظلم دی او پرخلاف ېې قدم پورته کول د دولت فریضه ده .
حقیقي علماو ته په پوره درناوي ،په افسوس سره باید ووایو، چې د رمضان المبارک میاشتې په رارسیدو سره د هېواد یو شمېر د دولت په درسترخوان ناستو عالمانو له طالبانو وغوښتل، چې د روژې په میاشت کې دې جګړه نه کوي، په دې میاشت کې وینه تویول ګناه ده، په دې میاشت کې جګړه نارواده، په دې میاشت کې د جګړو له امله بې کوره کیدل ظلم دی .
دا نو اوس عجیبه عالمان دي! په ټول کال کې جګړه روا وه او ظلم ورته نه ښکاریدو؟.
په ټول کال کې وینه تویول ګناه نه وه ؟ اوس په روژه کې ګناه ده ؟.
دا ډول اشخاص په ټول کال کې د دولت له درسترخوانه سر نه راپورته کوي، په کال کې یوځل چې روژه را شي دوې ته د انسانانو وینه تویول ګناه ښکاره شي .
د هېواد ټول علماء مسئولیت لري، چې د تل لپاره په هېوادکې د وینو تویولو مخه ونیسي، د تل لپاره پر موږ راتپل شوې جګړه زموږ له سره لرې کړ ي، دتل لپاره په هېوادکې د ورور وژنو مخه ونیول شي او پرځای يې تلپاتې سولې ته زمینه برابره شي.
افغانان به ولې د بې ځالې مرغانو په څېر په پردیو هېوادونوکې شپې نه تیروي، چې دهېواد عالمان ېې ټول کال په یادو ناخوالو سترګې پټوي، په ټول کال کې جګړې او وژنې ورته نه ښکاري، یواځې د روژې په میاشت کې د افغانانو بده ورځ وریاده شي .
ناټو چې د امریکاپه مشرۍ ټول کال په افغانستان کې د افغانانو په وینو د جګړې څرخ ګرځوي زمونږ ارګ میشتي علماو ته هغه نه ښکاري ، ټول کال افغانان په یوه اوبل نامه نیسي او وژني ېې، هغه ورته نه ښکاري.
افغان ولس چې دا ډول یوشمیر عالمان لري، د خپل ګوند، تنظیم او نظام وسله واله جګړه د نورو په مقابل کې روا ګڼی، افغانان به د بې ځالې مرغانوپه څېر په پردیو هېوادنوکې شپې تیروي.
کاش چې د هېواد عالمان دخپل ولس دبرخلیک په اړه په خپلو ګریوانونو کې سرونه ټیټ اوخپل مسئولیت ته متوجې شي.
