ایا اشرف غني به په هلمند کې د خیالي ملي اردو اصلاح وکړاې شي؟
سرلیکنه
د هلمند ولایت د یو شمیر سیمو نه چې جګړه لښکرګاه ت رانږدې شوه، ولایتي چارواکي، په ولسي جرګه کې د هلمند استازي او امنیتي مسئولینو خپله وارخطايي په وار وارسره څرګنده کړه، چې هلمند له سقوط سره مخ دی.
وړمه ورځ اشرف غني هلمند ولایت ته سفر درلود، د ارګ په اعلامیه کې ددې سفرموخه د هلمند د امنتي ادارو د اصلاحاتو یادونه شوې وه، چې اشرف غواړي په هلمند کې ټولې ملکي او امنیتي ادارې سره هم غږي او اصلاح کړي.
د ارګ په اعلامیه کې ویل شوي وو، چې اشرف غني به د هلمند ټولو امنتیي مسئولینو، علماو او قومي مشرانو سره وګوري، خو پر ځای ددې چې د هلمند د اوسیدونکو توقع پوښتنو ته ځواب ووايي، په یوه پوځي قرارګا کې ېې د برنامې له مخې له څو امنیتي مسئولینو او ولایتي چارواکو سره ولیدل او د لښکرګا څخه يې چې ټولو قومي مشرانو ترې تمه درلوده لیدنه هم ونه کړه .
د هلمند ټولو دولتي او ولسي وګړو د روانې جګړې، چې د هلمند مرکز ته نږدې شوې ده د پاې ته رسیدو غوښتنه کوله، په ځواب کې اشرف غني همدا یوه خبره کوله چې زه په هلمند کې د ملکي او امنتي ادارو اصلاحات او همغږي رامنځته کوم.
لومړی خو د یونیم کال په موده کې ولسمشر د خپل ولس سره یوه کړې ژمنه هم سرته نه ده رسولې او که ېې د کاغذ پر مخ منل شوې ژمنې ورسره ومنو دا به په هلمند کې د خیالي ملي اردو اصلاحات او همغږي څرنګه راولي او یواځې هلمند هم نه دی، په ټولو ولایتونو کې د هلمند په څیر لوبه روانه ده، چې د خیالي ملي اردو په څیر ېې نورو ادارو کې هم خیالي مقررئ کړي او په عمل کې هیڅ هم نشته .
که په هلمند کې د اشرف غني په وینا د خیالي تشکلاتو او ادارو په اصلاح او همغږۍ کار پیل شي د هېواد د نورو ادارو اصلاح به څنګه شي؟ یواځې هلمند خو نه دی، ټول هېواد کې خیالي تشکیلاتو او خیالي ملي اردو په نامه معاشونه تر لاسه کیږي.
اشرف غني د هلمند چارواکو او قومي مشرانو ته وعده ورکړه، چې د کجکي د بند رغولو کارونه به ګړندي کړي، خو له جګړې سره به څه کوي؟
ولس ته د تیر دور د واکمن حامدکرزي او اشرف غني همدا ځواب دی، چې موږ د جګړې له امله کارونه سرته نه شو رسولای.
اشرف غني په هلمند کې یوې بلې موضوع ته هم اشاره وکړه، چې د نورو په زور او فشار سره مونږ سوله نه کوو، خو دې ته هم سوچ نه کوي، چې په هېواد کې دا جګړه چا پیل کړې ده؟
د نورو په زور جګړې ته دوام ورکوي او خپل ولس پکې سوزوې او کله چې د سولې خبره شي بیا وايي دا د نورو په زور سوله ده.
ترڅو چې د ولس رایو ته درناوی ونه شي او د جګړې د پیل لا ملونه له منځه ولاړ نه شي نه حکومت حکومت کیدای شي او نه به جګړه پاې ته ورسیږي. که د امریکا او نورو تاړاکګرو هېوادونو په زور وای اوس به په هېواد کې یو وګړی هم ژوندی نه و پاتې.
د امریکا په مشرۍ د ناټو پوځونه په افغانستان کې امن او ابادۍ ته نه دي راغلي، تر څه حده خو د بن غونډې غلامانو پرې خپل ولس وواژه، بې پته ېې کړ او نور هم غواړي د ولسمشرۍ تر نامه لاندې د خپل مظلوم ولس په وژنه د غلامۍ ثبوت ورکړي.
اشرف غني د هلمند د ملکي او امنتي ادارو په اصلاح ولس ته په سترګو کې خاورې ور وراچوي او غواړي د خپلې غلامې دورې موده اوږده کړي، خو نه د خیالي تشکیلاتو او ادارو د اصلاح په نامه جګړه پاې ته رسیږي او نه نور دا اولس په دې غلامه اداره باورکوي.
