سرلیکنه
د اشرف غني لومړی مرستیال دوستم له اشرف غني څخه خوابدی شوی و، خو اوس له دواړو(د ملي یووالي) له حکومت څخه خوابدی دی او په اشرف غني او عبدالله دواړو یې نیوکې کړي دي .
د جنرال دوستم لومړۍ خوابدي سیاسي رنګ نه درلوده، یواځې په ځان پورې ېې محدودیت لرلو، خو په دې دویم ځل خوابدۍ کې ورسره نورهمفکره ملګري هم شته او هم ېې خوا بدي سیاسي رنګ لري، ترلومړۍ خوابدۍ ېې دا خوابدي ژور والی هم لري.
دوستم په خپله خپره کړې ویډیوکې اشرف غني او عبدالله دواړه پرانحصار تورن کړي دي او ویلي ېې دي: کومو مشرانو چې د ملي یووالي د حکومت په جوړولو کې ونډه اخیستې دهغوې حقوق ېې تر پښو لاندې کړي دي.
دوستم پر اشرف غني او ډاکټرعبدالله په خپلو کې د پنځوس پنځوس واک ویشلو د نیوکو ترڅنګ وايي: د دواړو ترمنځ اوس هم د کورنیو او د فاع په وزارتونو اختلاف روان دی.
دوستم خپله په خپل حکومت د سقوط اعتراف کړی او وایي: که د اشرف غني او عبدالله حکومت په همدې ډول په اختلاف کې پاتې شي سقوط به ېې نږدې شي، ځکه چې اوس ملي اردو هم سیاسي شوې ده په ولسوالیو او ولایتونو کې نظامي مسئولین په سیاسی جوړجاړي سره مقرریږي.
د دوستم اختلاف دا ځل د اشرف غني سره بهرنیو هيوادونه ته دهغه په لومړۍ مرستیالۍ راغلی، چې که اشرف غني بهر ته سفرکوي نو د صدارت د چارو سمبالښت به د دوستم پرغاړه وي، خو اوس داسې نه دي شوي.
د دولت د سقوط لا املونه نورهم شته او د دوستم نیوکې هم په ځای دي، چې د دولت پر دواړو واکمنوېې کړي دي.
څرنګه چې دواړو ډاکټرانو واک سره شریک کړی دی دا رنګه ېې ګټې هم سره شریکې کړي دي.
په دولتي ادارو او په ځانګړي توګه په نظامي تشکیل کې بې باوري او ا ختلا ف دومره حد ته رسیدلی که دا روا نه بې باوري او اختلاف دوام وکړي، نو یواځې دوستم نه بلکې د دولت ټول لوړپوړي چارواکي او پارلمان به ېې د سقوط اعتراف وکړي.
دا دولت هغه وخت له امکاني سقوط څخه ژغورل کیدای شي، چې دولتي چارواکي د ولس راتلونکي ته په فکرکې شي، چې څرنګه خپل نظام او ولس له تباهیو وژغوري، خو کړنه په موجوده حکومت کې ناشوني ده، چې مخ په زوال او پښې ښویدلې حکومت دې له سقوطه وژغوري.
جنرال دوستم چې په دواړو ډاکټرانو غني او عبدالله د کورنیواو دفاع په وزارتونواو په خپل منځ کې د ګټو د ویش لامل د نظام سقوط یاد کړی او دا به ېې یو لامل وي، خو خپله دوستم هم د نظام دسقوط لامل ګرځیدلی او په خپله بې کفایتۍ ېې په غیرمستقیم شکل سره اعترا ف کړې، چې وايي: د افغانستان ځینې سیمې د بهرنیو استخباراتي دستګاو لخوا اداره کیږي.
په افغانستان کې د موجوده نظام د سقوط لکه ددفاع او کورنیوچارو په وزارتونواختلاف، د ولسي جرګې د یو شمیر وکیلانو د استیضاح پرمهال د پردې ترشاه جوړجاړی او ترې باج اخستل او نور امکانات به هم وي، خو د دولت سره د دوستم ژور اختلاف او پر دواړو ډاکټرانو، چې دوستم په ګټو کې سره شریک یاد کړي دي دا نظام به سقوط ته نږدې کړي.
