ډاکټر آصف
د حکمتيار صیب له لوري په خيبر پښتونخوا کي مېشت مهاجرينو ته د هغوی د یوه ورلیږلي لیک په ځواب کې داسې لیکلي دي!
(( السلام عليکم و رحمة الله وبرکاته وبعد:
الله تعالی مو روغ، خوښ او موفق لره او د خپلو ايماني مسؤليتونو د اداء کولو توفيق مو تل په برخه وه.
- ستاسو له گډ ليک ډېره مننه، ستاسو د نېکو احساساتو، اسلامي غيرت او همت قدرونه کوم، دعاء کوم چي الله تعالی ستاسو ټولي نېکي هيلي په دنيا او آخرت کي تر سره کړي.
- مطمئن اوسئ چي إن شاء الله په لوړ سر به هېواد ته ستنیږئ ، حزب اسلامي ستاسو کور او سنګر دئ، د سولي په مذاکراتو کي د حزب اسلامي يو اساسي شرط په عزت او خپله خوښه د مهاجرينو بېرته ستنېدل او د هغوی د استوګني لپاره مناسب شرائط او تسهيلات برابرول دي. په معاهده کي راغلي چي په لومړي سر کي به د شلو زرو کورنيو لپاره تياري نيول کېږي.
په لوی الله مو سپارم . په احترام
حکمتيار
لاسليک
جوزا ۹۵))
درنو هیوادوالو!
د حکمتیار صیب د پورته ځوابیه لیک په لوستلو سره به تاسې حس کړي وي چې حکمتیار صیب ته دا لیک چا استولی او د څه لپاره یې استولی او د حکمتیار صیب د ځواب مطلب څه او هدف یې څوک دي؟
دې په نوم جهادي رهبرانو د جهاد له پیل نه د بې وزله افغانانو له نوم نه سوء استفادې کړي دي، په دې معنی چې کله هم دا غټان څه ګټه وټه ترلاسه کول وغواړي نو د بې وزله افغانانو او بیچاره مهاجرینو له نوم نه بده استفاده کوي.
لیک په شمشتو کې پرتو حزبيانو حکمتیار صیب ته استولی و خو په خیبر پښتونخوا کې د ټولو افغان مهاجرینو لخوا یې وانمود کړی دی، او حکمتیار صیب هم د دې لپاره چې د بیچاره مهاجرینو په سترګو کې یو ځل بیا شګې وشیندي وایي چې:
(مطمئن اوسئ چي إن شاء الله په لوړ سر به هېواد ته ستنیږئ ، حزب اسلامي ستاسو کور او سنګر دئ، د سولي په مذاکراتو کي د حزب اسلامي يو اساسي شرط په عزت او خپله خوښه د مهاجرينو بېرته ستنېدل او د هغوی د استوګني لپاره مناسب شرائط او تسهيلات برابرول دي.
(په معاهده کي راغلي چي په لومړي سر کي به د شلو زرو کورنيو لپاره تياري نيول کېږي)
دا شل زره کورنۍ څوک دي؟؟ باید حکمتیار صیب ملت ته د دې وضاحت ورکړي، او که وضاحت نه سترګې پټې کړي نو هم ملت په دې پوهیږي چې مراد ورنه په شمشتو کې هغه حزبیانی کورنۍ دي چې ټول عمر یې د مهاجر، شهید، یتیم، کونډې او نورو په نومونو مرستې راغونډې کړي او په خپلو جیبونو کې یې اچولي، خپلو بچو ته یې د ښه عیش او نوش او د ژوند هر ډول آسانتیاوې برابرې کړي وې او د مهاجرینو یتیمو بچیانو به ورته په خوارو سترګو کتل او دوی به های لکسو موټرو کې ښکته پورته کیدل. دا صحنې به هیڅکله له غریبو او بیچاره مهاجرینو نه هیرې نشي.
حکمتیار دلته یو ځبل بیا غواړي چې د بوسو لاندې اوبه تیرې کړي، د دې خبرو نه په ظاهره ټول پراته مهاجرین دي خو په حقیقت کې یې هدف یواځې د حزبیانو کورنۍ دي چي په شمشتو نصرت مینه کیمپ او یو څو نور ځایونو کې پراته دي، په دې معنی چې حزبیان او مشر یې حکمتیار په دې هڅه کې دي چې د ټولو دری ملیونه پرتو مهاجرینو له نوم نه په استفادې سره یو ځل بیا ناروان امتیازات خپلو حزبیانو ته په لاس ورکړي.
دې رهبرانو پخوا هم د روسانو پر ضد د جهاد په وختونو کې په خپل بې وزله او بیچاره ولس ورته لوبې کړي دي او اوس هم دوام ورکول غواړي. هغه مهال به تر ټولو زیات امکانات، راشن، تنخاګانی، موټرې، غذایی مرستې، د پوښاک مرستې، او داسې نور ټول لومړې د رهبرانو د کورنیو په اختیار کې وو، ورپسې یې خپلو خپلوانو او ورپسې به یې د رییسانو، او قومندانانو ته ورکول کیدې، او بې بیچاره فقیرو او مسکینو او غریبو مهاجرینو ته به که په آخر کې څه پاتې وو نو ورکول به یې هغه هم په ډیر تکلیف سره او که خلاص شوي به وو نو مهاجرینو به په ښیراو لاس پورې کاوه ځکه چې بله چاره یې نه درلوده.
مونږ نه پوهیږو چی دا رهبران د اسلام په نوم ولې له خپل غریب او بیچاره ولس نه هیڅ بې هیڅه غچ اخلي. مونږ نه پوهیږو چی حکمتیار صیب څه وایی؟؟؟
