۱۱ د دروغژنو مدعيانو د نبوت ظهور
د قيامت له نښانو څخه د داسې دجالي او دروغژنو خلکو ظهور هم دی کوم چې د نبوت دعوه کوي او د خپلو خرافاتو او باطلو خبرو په ذريعه فتنه پيدا کوي، نبي کريم صلی الله علیه وسلم امت ته خبر ورکړی چې د همدغو دروغژنو مدعيانو شمير ديرش (۳۰) ته نږدې دی، نبي کريم صلی الله علیه وسلم فرمايلي :
)لَا تَقُومُ السَّاعَةُ حَتَّى يُبْعَثَ دَجَّالُونَ كَذَّابُونَ قَرِيبًا مِنْ ثَلَاثِينَ كُلُّهُمْ يَزْعُمُ أَنَّهُ رَسُولُ اللَّهِ(
ژباړه :
قيامت تر هغه وخته نه قايميږي تر څو چې ديرشو ته نږدې دروغژن دجالان پيدا نشي، په هغوی کې به هر يو دا دعوه کوي چې دی د الله رسول دی ([1] ).
دا نښانه هم ظاهره شوې، په پخوانۍ او اوسنۍ زمانه کې دنبوت ډير دروغژن مدعيان مخته راغلي، هيڅ بعيده نه ده چې له لوی دجال (الله تعالی دې مونږ ټول د هغه له شر څخه وساتي) څخه مخکې مخکې د نبوت يو څه دعواداران راشي، رسول الله صلی الله علیه وسلم يوه ورځ خطبه وئيله وې فرمايل: په الله قسم! قيامت نه قايميږي تر څو چې ديرش دروغژن دجال ظاهر نشي، په دې سلسله کې آخيري کړۍ د مسيح دجال ده ([2] ).
حضرت ثوبان رضی الله عنه روايت کوي چې نبي کريم صلی الله علیه وسلم وفرمايل : قيامت تر هغه وخته نه قايميږي تر څو چې زما د امت يو شمير قبايل دوباره له مشرکينو سره يو ځای نشي او هغوی د بتانو عبادت ونه کړي، زما په امت کې به ديرش دروغژن ظاهر شي او په هغوی کې به هر يو ګمان کوي چې نبي دی، حلانکه زه خاتم النبيين يم، له ما وروسته هيڅ نبي نشته ([3] ).
همدا شان په يوه بل حديث کې نبي کريم صلی الله علیه وسلم د اوه ويشتو (۲۷) د نبوت د دروغژنو مدعيانو خبر ورکړی، په هغوی کې به څلور ښځې وي، په هغوی کې به هر يو دعوه کوي چې هغه د الله رسول دی.
سيدنا حذيفة رضی الله عنه بيان کوي چې رسول الله صلی الله علیه وسلم وفرمايل : زما په امت کې به اوه ويشت دروغژن دجال، د نبوت مدعيان به پيدا شي، په هغوی کې به څلور ښځې وي، زه خاتم النبيين يم، له ما وروسته هيڅ نبي نشته ([4] ).
د دغو خلکو لوی شمير په ماضي کې ظاهر شوی.
(۱) د رسول الله صلی الله علیه وسلم د ژوند مبارک په آخيري ورځو کې په يمن کې اسود عنسي له اسلام څخه مرتد شو او د خپل ځان د نبي کيدو اعلان يې وکړ، د ده ارتداد په عهد رسالت کې واقع کيدونکی تر ټولو اولين ارتداد دی، د هغه جنګي ملګرو په دريو يا څلورو مياشتو کې پيش قدمي وکړه او د يمن په ټولو سيمو يې قبضه وکړه، نبي کريم صلی الله علیه وسلم د يمن مخلصو مسلمانانو ته پيغام وليږه چې دغه دروغژن دجال قتل کړي، هغوی د نبي کريم صلی الله علیه وسلم حکم ته لبيک وويل او د هغه د ښځې په مرسته يې هغه وواژه، د هغه ښځې پر الله تعالی او د هغه پر رسول صلی الله علیه وسلم ايمان درلود، اسود د همدغې ښځې ميړه قتل کړ او په زور يې له هغې سره واده وکړ، د هغه له قتل سره سم په يمن کې اسلام او اهل اسلام په غلبه کې شول، د يمن مسلمانانو دغه ټول روداد نبي کريم صلی الله علیه وسلم ته ليکلي ور وليږل مګر الله تعالی هغه ته د شپې د وحې په ذريعه خبر ورکړ او نبي کريم صلی الله علیه وسلم يې سره له ټولو صحابه ؤ رضی الله عنهمله ټول صورت حال څخه خبر کړل، د دغه دروغژن سړي د نبوت زمانه يواځې دری يا څلور مياشتې وه.
[1] – صحيح البخاری، المناقب، حديث : ۳۶۰۹.
[2] – مسند احمد : ۵/ ۱۶.
[3] – سنن ابی داؤد، الفتن والملاحم، حديث : ۴۲۵۲، وجامع الترمذی، الفتن، حديث : ۲۲۱۹، وهو حديث صحيح.
[4] – مسند احمد : ۵/ ۳۹۶، والطبرانی فی المعجم الکبير : ۳/ ۱۷۰.
