فاتح کاروان
صلیبي امریکایان افغانستان ته د دې لپاره نه دي راغلي چې یا یې د افغانستان جوړول هدف دی او یا د افغانستان د خلکو سره مرسته، بلکې امریکایي فرعون په افغانستان کې خپل اهداف لري او نور نو باید دا خبره د افغانستان ملت تسلیم کړي؛ په دې معنی چې که اوس هم څوک د امریکایانو په بشر دوستۍ باور لري یقیناً چې سخت تیروتلي او د خپل ځان، ایمان، ولس، خاورې او ټول اسلامي امت سره یې دښمني شروع کړی ده.
د کندوز وروستۍ وحشتناکه بمباري به د امریکایانو وروستې جنایت نه وي بلکې دا پنځلس کاله چې د دوی وحشتونه روان ؤ دا سلسله به همداسې دوام ولري، هغو خاینانو چې د امریکا سره یې امنیتي تړون امضاء کړی وو په حقیقت کې دا په افغانستان کې د امریکا مداخلې او وحشتونو ته قانوني حیثیت ورکول و او طبیعي ده چې کومو خلکو د تړون په امضاء کولو رضایت ښودلې ؤ هغوی د امریکایي وحشي عسکرو له وحشت نه ملاتړ کړی دی، نن که د کابل رژیم چارواکي هڅه کوي چې د دا ډول وحشتونو ملامتیا په طالبانو ور واچوي دا هم څه نوی خبره نه بلکې دا اوس یو معمول جوړ شوی چې د هر جنایت عاملین امریکایان او یا داخلي لاسپوڅي وي د کابل رژیم چارواکي او د استخدام شوو رسنیو غلام خبریالان یې پړه پر نورو خواو وراچوي په پای کې امریکایان سپین بازان راووځي او د شهیدانو ویني په ډالرو و پلورل شي!!
له یوې خوا بې کاري، اداري فساد، وچکالي او نا امني ده او له بلې خوا د سرو امریکايي اشغالګرو چاپې او ړندې بمبارۍ دي، له یوې خوا په قصدي ډول د افغانانو د اقتصاد د تباه کولو پروسه ده او له بلې خوا د ګوډاګي رژیم د چارواکو او نظامیانو لخوا د عامو خلکو په ناموس بلوسیدل او د ملي شتمنیو لوټ او تالان دی مګر د تأسف ځای دادی چې لا تر اوسه افغان ملت داسې یوه تګلاره غوره نکړه چې په مطلق ډول یې د امریکایي اشغال پرضد وکاروي او نور له دغه صلیبي داړه مارانو خلاصون ومومي!!
موږ ډیر داسې خلک وینو چې وایي د امریکا سره دښمني کوو خو د اشرف غني او ملي؟ اردو ملاتړ ځکه کوو چې دا خو افغانان دي! زموږ د ټولنې د دغه وروسته پاتې طبقې ملاتړ له اشرف غني څخه په دې معنی دی چې دوی د هغه پالیسۍ ملاتړ کوي کومه پالیسي چې امریکایي د اشرف غني او غلامی اردو په توسط عملي کوي او په اخر کې دې نتیجې ته رسیږو چې امریکا د همدغه بې ضمیره خلکو په مرسته خپل یرغل ته دوام ورکوي او دا هغه خلک دي چې موږ يې د امریکا د غلامانو په نوم پیژنو هغه که خبریالان یا لیکوالان دي او یا که د مدني ټولنو ایمان پلورونکي فعالان؛ که افغان ولس له امریکایي اشغالګرانو څخه ځان ژغورل غواړي نو باید چې غوڅ دریځ غوره کړي دا بې طرفي یې د خلاصون لاره نه ده.
بله مهمه خبره داده چې د کندوز له پیښی وروسته ځینو کسانو دا ګیله کوله چې ولې د دې وحشت د غندنې لپاره لاریونونه و نه شول، دلته له یادو کسانو دا پوښتنه کوو چې کوم وخت لاریونونه کېدل تاسو د لاریونوالو په خلاف د شمال د متعصبو کړیو په تبلیغاتو تیروتلئ او لاریونوالو ته مو په لاشعوره توګه د پنجابیانو نسبت کاوه اوس به نو تاسو ته معلومه شوي وي چې لاریونوال ولې دومره بد یادیدل، اصلاً همدغه لاریونونه و چې د ملت د ویښتابه لپاره مؤثر تمامېدل اوس چې لاریون نشته نو امریکا او غلامان یې په سرو سترګو خپلو وحشتونو او ظلمونو ته دوام ورکوي!! نو ګیله له نورو مه کوئ بلکې له خپله ځانه یې وکړئ.
دا خبره په یاد ساتئ چې تر څو امریکایي اشغالګران وي او تر څو یې غلامان پر ملت مسلط وي روان وحشتونه، بمبارۍ،چاپې، افغان وژنه، برامتی، رشوت، بیکاري، د خلکو د ناموسونو سپکول، د علماؤ شهادتونه، اشغالګرو او ډمانو ته د اسلام او افغانستان د اتلانو په نوم مډالونه ورکول، د ګاونډیو هیوادونو لخوا د افغانستان ځمکې غصب کول، چور چپاول، کفر ته تبلیغ، بې حیایي او بلاخره د افغانستان ورانونه به نه یواځې دا چې دوام ولري بلکې ورځ تر بلې به دا ناخوالې ډیریږي؛ ولی چې د امریکایانو تاریخ له همداسې کرغیړنو کړنو څخه ډک دی.
د ننګرهار پوهنتون محصلین ځکه تیت او پرک شول چې هغوی د اشغالګرو له اهدافو څخه خبر ول، مګر ملت پرې خاموشي غوره کړه، هره ورځ د مدارسو او علماؤ پر وړاندې د امریکایانو سیاستونه عملي کیږي مګر ملت خاموش دی او بلاخره که دا حالت دوام وکړي نو یوه ورځ به مو حال د برمایانو او فلسطینیانو څخه هم بد تر شي نوره مو خوښه چې راویښیږئ او که د غفلت په خوب ویده پاتې کیږ ئ
