ډاکټر آصف
دونالد ټرمپ انتخابات وګټل او د متحدو ایالتونو ۴۵ ولسمشر شو. هغه هیلرې کلنټن ته ماتې ورکړه. ټرمپ یو پانګه وال او سوداګر دی چې نږدې ۷۰ کلن دی. کومه سیاسي تجربه نلري.هغه اوس مهال د افغانستان په اړه خپل موقف ندی څرګند کړی خو تر هغه مخکې یې دافغانستان په اړه ځینې څرګندونې کړې وې. ټرمپ یواځې د امریکا د فلورېډا ایالت د اورلنډو په ښار کې د همجنسبازانو په یو نایټ کلپ باندې د برید په غندلو کې افغانستان یاد کړی و. نوموړي ویلي وو سره له دې چې په اورلنډو کې د همجنسبازانو پر نایټ کلب بریدګر عمر متین په نیویارک کې پيدا شوی و، خو په خټه افغان دی، او افغانستان کې زېږېدلی. او امریکا ته د راغلیو افغان مور او پلار زوی و. دا برید په امریکا کې د سپتمبر له پيښې وروسته تر ټولو خونړی وبلل شو. ټرمپ، له دغې پيښې وروسته یو وارې بیا امریکا ته د مسلمانانو پر راتګ د بندیز غوښتنه تکرار کړه. ټرمپ یو وارې فاکس نیوز ټلویزون ته ویلي وو:
موږ به په افغانستان کې پاتي شو او خپل تر وسې څه وکړو ځکه زه فکر کوم دا په منځني ختیځ کې هغه هیواد دی چې موږ باید هلته تللي وای ځکه چې دغه هیواد د پاکستان په ګاونډ کې دی. ټرمپ د ۲۰۱۵ کال د اکتوبر په میاشت کې سي ان ان تلویزون ته ويلي وو چې په ۲۰۰۱ کال کې د امریکا په مشرۍ د طالبانو پر رژیم پوځي یرغل سم کار و. او موږ عراق ته په تلو کې تیر وتلي وو.
ټرمپ همدغه راز ویلي وو چې: افغانستان پاکستان ته نژدی دی. تاسو باید د (پاکستان) د اتومي وسلو په اړه ډیر محتاط واوسئ. هر څه په اتومي وسلو پورې تړلي دي. که اتومي وسلې نه وي بیا به لوبه بل ډول وه“.
ټرمپ لدې وړاندې د امریکا مشهور تلویزوني چاینل، فاکس، خپرونې کې د افغانستان په اړه د دې پوښتنې په ځواب کې چې آیا ته به له افغانستان څخه ټول امریکايي ځواکونه وباسي او طالبانو ته به دا اجازه ورکړې، چې بيرته واک ترلاسه کړي؟
هغه وویل:
زه فکر نکوم، چې افغانستان دې د پاکستان هومره لویه ستونزه وي. ماته ټول خلک وايي چې طالبان په پاکستان کې دي او په افغانستان کې نشته د القاعدې مشر، اسامه بن لادن، په پاکستان کې و، موږ ولې پاکستان ته د کال سلګونه میلیارده ډالره ورکوو؟
که همدا نن پاکستان ته ووایم چې: ګورئ یارانو، تاسې پر ما ګران یاست او موږ له تاسې نه اسامه غواړو او که تاسو اسامه رانکړئ، موږ میلیاردونه ډالر نور نه درکوو. پوهیږئ څه به وشي، اسامه بن لادن به د سترګو په رپ کې د سپينې ماڼې په دروازه کې ودرول شي.
خبریال بیا خپله پوښتنه تکرار کړه: آیا له افغانستان څخه به ځواکونه وباسئ؟
ټرمپ وویل ” بلې، وباسم یې خو بیا به طالبان راشي؟
ټرمپ زیاته کړه: ګورئ، طالبان حتماُ بيرته راتلی شي، ځکه چې هغوی په پاکستان کې دي.
خبریال بیا پوښتنه وکړه چې: په دې صورت کې به پر پاکستان برید وکړئ؟
ټرمپ وویل:
زه د ځواکونو د استولو ډېر پلوی نه یم. زه پر هوايي ځواک ډېر باور لرم. تاسو د هوايي ځواک تاثیر په لیبیا کې وليد. تاسو له دې لارې له تلفاتو پرته پر هغوی اور بلولی شو.
ټرمپ د دې پوښتنې په ځواب کې چې: د هوایی بریدونو له لارې به ډېر ولسي خلک ووژنئ؟
ټرمپ وویل: نه داسې نه ده، که تاسو قوي استخبارات ولرئ، داسې نه کیږي، استخبارات هغه څه دي، چې دا هيواد یې اوس کم لري.
خبریال بیا پوښتنه وکړه چې: نو تاسو له افغانستان نه وځئ، سمه ده؟
ټرمپ وویل: د افغانستان په اړه باید ووایم، زه غواړم نور خپل هيواد اباد کړم، افغانستان پر یوه لوی کړکیچ بدل شوی دی. موږ ته څه کول په کار دي؟ موږ په افغانستان کې ویجاړۍ ورانۍ لرو، موږ آن خپل هيواد نشو ابادولی. موږ خپل ښوونځي نشو رغولی، موږ خپلې لویې لارې نشو جوړولی، موږ هيڅ هم نشو جوړولی. له بلې خوا، افغانستان هم لرو، کله چې زمونږ یو سرتیری په کې خپل اعصاب له لاسه ورکړي او عام خلک ووژني، بیا نړیوال له دې کبله موږ غندي او له موږ نه نفرت کوي. موږ باید نور پر خپل هيواد پيسې ولګوو، موږ باید خپل هيواد ورغوو، راځئ چې خپل کار وکړو او له افغانستان څخه ووځو. موږ په افغانستان کې میلیاردونه ډالره ضایع کړل، لسګونه انسانان خو پریږده، چې له لاسه مو ورکړل، هغوی نه یادوم چې له افغانستان نه راځي او له روانې ستونزو او کړاوونو سره مخامخ وي. موږ داسې مشرانو ته اړتیا لرو، چې په دې پوه شي، له دغو حالاتو سره څه ډول چلن وکړي”.
ټرمپ د ۲۰۱۳ کال د جنورۍ په ۱۱ نيټه، یو وارې بیا د افغانستان څخه د امریکايي ځواکونو پر وتلو ټينګار وکړ، هغه پر خپل ټویټر پاڼې کې ولیکل چې:
راځئ چې له افغانستان څخه ووځو. زموږ سرتيري د هغو افغانانو له لوري وژل کیږي چې، موږ روزلي دي. موږ هلته میلیاردونه ډالر ضایع کړل. دا د منلو نه دي!”
