(کابل ټکی کام ۱۳۹۵ لیندۍ ۵) زرغون خوږیاڼي
د ایران د سمنان ښار د هفت خوان په نوم د اورګاډو په یوه تم ځای کې دوه اورګاډي سره جنګیدلي دي، چې له امله یې ۱۵ تنه وژل شوي او ۶۲ نور ټپیان شوي دي.
په سیمه کې د سرې میاشتې د ژغورنې عملیاتي معاون شاهین فتحی ویلي، چې د اورګاډو د ټکر په پيښه کې ۴۳ ټپیان د دامغان روغتون، ۹ټپيان د ژغورونکو الوتکو په مټ په سمنان کې د کوثر روغتون ته وړل شوي دي، ددوی په وینا د پيښې په ځای کې ۱۰ ټپیان نور موندل شوي دي.
د ایران د بیړنیو خدمتونو رئيس حسین کولیوند ځايي رسنیو ته ویلي، په سمنان ښار کې د اورګاډو په هفت خوان تم ځای کې د ټکر له امله د وژل کسانو شمیر دومره دی، چې د ایران ملت به د ویر په ټغر کینوي.
حسین کولیوند زیاتوي، چې سیمې ته ۳ الوتکې او په لسګونو امبولانسونه د ژغورنې لپاره لیږل شوي دي، د اورګاډو په ډبو کې د اور لګیدنې له امله د مرګ ژوبلې کره شمیره نه ده معلومه.
د پيښې په ځای کې د ژغورنې ټیمونو ویلي چې کیدای شي د مرګ ژوبلې شمیره نوره هم زیاته شي.
