(کابل ټکی کام ۱۳۹۵ لیندۍ ۱۰) زرغون خوږیاڼی
د سوريې رژيم په هغو ولسي وګړو بمبار کړی، چي د حلب له ختیځ څخه یې د تيښتي هڅه کوله، د لومړنیو معلوماتو له مخې په بمبار کې ۴۵ تنه وژل شوي، چې ښځې او ماشومان هم پکې شامل دي.
سیمه کي عیني شاهدان وايي، د وژل شویو کسانو جسدونه په واټونو کي پراته دي او د روغتونونو د نه شتون له امله ټپیان د وینو د بهېدلو له امله ساه ورکوي.
سوريايي فعالانو داسي ویدیوګانې خپرې کړي، چي ټپیان په وینو لت پت په سړکونو کې پراته دي.
سلګونو سوريایانو د روسیې او سوريې د هوايي بریدونو له ویري د حلب د ختیځ جب القبة له سیمي څخه د تيښتي هڅه کوله، چي په لاره کي الوتکو بمبار پرې وکړ.
ویل کیږي، چي د وژل شویو او ټپیانو زیاته برخه ښځې او ماشومان دي.
د سوریې د بشري حقونو سازمان وايي، دحلب د ختیځ سلګونه اوسيدونکي چي هوايي بریدونو د خپلو کورونو پرېښودلو ته اړ کړي وو د سوريې د پوځیانو له لوري نیول شوي دي.
یاد سازمان تائيد کړې چي تراوسه ۳۰۰ کسان لادرکه شوي، چي ځیني یې د سوريې د پوځ پخواني غړي دي او داسي ویره څرګنده شوې، چې کېدلی شي هغوی ته سختې شکنجې ورکړل شي او یا ووژل شي.
د بشري حقونو سازمان وايي، په تیرو څلورو ورځو کي شاوخوا ۵۰ زره کسان د حلب له ختیځ څخه تښتيدلي دي.
د حلب وګړو غوښتنه کړې، د کلابند شوي ښار څخه دي د لسګونو زرو کسانو د ايستلو لپاره یوه خوندي لاره پرانيستل شي.
راپورونه وايي، د سوریې پوځیانو او د هغوی اړوند ملېشو په نیول شویو سیمو کي عام وژنه پيل کړې او ټول نارينه وژني.
بلخوا په سوریه کې د امنیت شورا د حلب د جگړې په اړه بیړنۍ غونډه رابللې ده.
د مهاجرینو لپاره د ناروې مؤسسې مشر جان اېگلنډ وایي “خلک په جگړې کې ایسار دي. شاوخوا دوه سوه پنځوس زره خلک د دواړو لورو په جنگ کې گیر دي. وضعیت له دې څخه نور نشي خرابیدی. دا هغه څه دي چې د بشر په توگه زموږ د وجدان لپاره به د بدنامۍ په یو داغ بدل شي.”
