(کابل ټکی کام ۱۳۹۶وری ۱۹) الماس خدرخېل
د سرپل ولايت په صياد ولسوالۍ کې طالبانو د امنيتي ځواکونو په ورغلې قوه وسله وال بريدونه کړي، چې په پايله کې يې اته پوستې نيولي او عسکرو ته يې درنه مرګ ژوبله اړولې ده.
يوې باوري سرچينې کابل ټکی کام ته وويل، په سيمه کې له دوه ورځو راهيسې درنه جګړه روانه ده.
سرچينه زياتوي، بيګا شپه سيمې ته په ورغلو افغان ځواکونو سخته جګړه شوې خو د تلفاتو په اړه يې کره معلومات نه لرل.
بل پلو د وسله والو طالبانو وياند قاري يوسف احمدي په خپله ټويټر پاڼه وايي، په دغه جګړه کې يې ۸ پوستې نيولي او ۴۰ عسکرو ته يې مرګ ژوبله اړولې ده.
طالبان وايي، په جګړه کې يې له عسکرو ۱۰ موټرسايکلونه، يو ټانګ او په زياته اندازه وسلې او مهمات نيولي دي.
دا په داسې حال کې ده، چې تېره ورځ هم سخته جګړه شوې وه چې طالبانو يو شمير عسکرو ته د مرګ ژوبلې وراړولو ادعا کوله.
تر دې مهاله دولتي سرچينو په دې اړه رسنيو ته څه نه دي ويلي.
خو په سيمه کې يوې سرچينې وويل، لا هم د ولسوالۍ مرکز ته څېرمه درنه جګړه روانه ده.
سرپل ولايت کې طالبان زيات نفوس لري چې وخت ناوخت د دولتي ځواکونو سره جګړې کوي، د دغه ولايت ډیری سيمې د وسله والو طالبانو تر ولکې لاندې دي.
