(کابل ټکی کام ۱۳۹۶غوایی ۶) الماس خدرخېل
روسيې له طالبانو سره د پوځي مرستو تورونه، چې د امريکايي چارواکو له خوا په دوی لګول شوي دي رد کړل.
د روسيې د بهرنيو چارو وزير سرګي لاوروف ويلي، دغه خبرې چې ګواګې له طالبانو سره مونږ د وسلو مرسته کوو او د امريکا او افغانستان ځينې چارواکي يې تکراروي، په بشپړه توګه بې بنسټه او منفي موضوعات دي چې روسيې پورې نښلول کېږي.
لاوروف وايي، داسې هيڅ ثبوت نه شته، چې له طالبانو سره د روسيې پوځي همکاري په ډاګه کړي او د چارواکو دغه څرګندونې ثابتې کړي.
وړمه ورځ افغانستان کې د ناټو او امريکايي ځواکونو عمومي قوماندان جنرال نيکلسن وويل، چې له طالبانو سره د روسيې د پوځي مرستو د همکارۍ راپورونه نه ردوي او زياته يې کړه په هلمند او د افغانستان په ځینو نورو سیمو کې روسۍ وسلې وېشل شوې دي.
له دې وړاندې وسله والو طالبانو هم د رسنیو له خوا د روسيې د نظامي او لوجستيکي همکاريو په تړاو د راپورونو خپرول د ځینو استخباراتي کړیو له خوا د دوی په اړه د افغانانو د ذهنیتونو د خرابولو هڅه ګڼلې وه.
طالبانو دوه اوونۍ د مخه کابل ټکی کام ته په يوه رالېږلې خبرپاڼه کې ويلي و (له تيرې څه مودې راهيسې ځينې کړۍ د رسنيو له لارې ادعا کوي چې د روسيي هيواد له اسلامي امارت سره نظامي مرستې کوي، اسلامي امارت دا ادعاوې په کلکه ردوي، اسلامي امارت له روسيې هيواد څخه هيڅ ډول نظامي او يا لوژيستيکي مرستې نه دي ترلاسه کړي.)
طالبان وايي، د خپل هیواد او ولس د ملي منافعو او آرام راتلونکي لپاره د ګاونډیو هیوادونو او ګڼو نورو سیمه یزو هیوادونو سره ښې اړیکي غواړي او په دې برخه کې له اړوندو اړخونو سره سیاسي تفاهم یوه ملي اړتیا بولي.
روسیې که څه هم له طالبانو سره خپلې اړیکي تائید کړي، خو دغې ډلې ته یې د پوځي مرستو د برابرولو او همکارۍ په باب راپورونه له وړاندې رد کړي دي.
