(کابل ټکی کام ۱۳۹۶غوایی ۶) الماس خدخېل
د زابل ولايت په خاک افغان ولسوالۍ کې ګډو ځواکونو شپني عمليات ترسره کړي، چې په پايله کې يې ولسي وګړو ته مرګ ژوبله اړولې او د دوه ميرمنو په ګډون يو شمير ملکيان يې له ځان سره وړي دي.
د زابل د والي وياند ګل اسلام سيال رسنيو ته ويلي، افغان ځانګړو ځواکونو د نړيوالو قواوو د غوڅ ملاتړ ماموريت د سرتېرو په ملتيا د يادې ولسوالۍ په مربوطاتو کې د مخالفينو پر ضد عمليات کړي، چې په ترڅ کې يې اته تنه وسله وال مړه او شپږ نور ژوندي نيولي دي.
په ورته وخت کې د دفاع وزارت وياند دولت وزيري وايي، (په دغو عملياتو کې د وسله والو يو تن قوماندان خالد اخوندزاده او د ده د وراره محمد حسن په ګډون درې تنه ازبکستانيان نيول شوي او اووه تنه نور داعش وسله وال وژل شوي دي)
خو طالبان د دولتي چارواکو ادعاوې ردوي او وايي، چې نه هلته داعشيان شته، نه بهرني اتباع او نه پر طالبانو عمليات شوي، بلکې بريد پر عامو خلکو تر سره شوی دی.
د طالبانو وياند قاري يوسف احمدي رسنيو ته ويلي، د وړمې شپې عمليات د خاک افغان د تنګي په سيمه کې شوي، چې په ترڅ کې يې درې تنه مېرمنې وژل شوي.
نوموړي دغه راز ويلي،په دغه عملياتو کې اته تنه ولسي وګړي ګډو ځواکونو له ځانه سره وړي، چې دوه يې ماشومان او دوه د خالد اخوندزاده د کورنۍ غړې مېرمنې دي.
د روانې مياشتې په پيل کې هم ګډو ځواکونو د عملياتو پر مهال د کاپيسا ولايت له نجراب ولسوالۍ څخه يوه ميرمن نيولې وه.
د امريکايي هوايي او ځمکنيو قواوو په ملاتړ افغان ځواکونه وخت ناوخت د هېواد په بېلابېلو سيمو کې شپني عمليات ترسره کوي، چې ډيری وخت پکې ولسي خلکو ته مرګ ژوبله اوړي.
