کابل ټکی کام |۱۳۹۶، غوایی ۸- طالبانو یو ځل بیا د تېر په څېر خپل نظامي پسرلني عملیات د هېواد په ټولو برخو کې اعلان کړل، او دغه عملیات یې د خپل دوهم مشر ملا اختر محمد منصور په نوم (منصوري عملیات) اعلان کړي.
طالبانو د یوې اعلامیې په خپرولو سره ویلي چې د ملا اختر محمد منصور تر مشرۍ لاندې طالبانو په هره برخه کې زیات پرمختګ کړی له همدې امله یې نوي عملیات د منصوري په نوم نومولي دي.
طالبانو ویلي چې روان عملیات به د نوعیت او تکتیکونو په ”بدلون سره په دوو، ملکي او پوځي برخو کې همزمان اعلان او پلي کیږي.“ په ملکي برخه کې به هغه سیمې چې د طالبانو تر لاس لاندې دي هلته به ملکي فعالیتونه زیاتیږي ”او په ټول کوښښ سره به ولس ته دسوکالۍ اوګټي رسولو په بیلابیلو برخو کې رغنده عملیات شروع کیږي.“
همداراز کومې سیمې چې د طالبانو په ولکه کې دي په نوي عملیاتو کې به ټول اداري واحدونو فعالیږي او د ولسي خلکو د حقوقي موضوعاتو د حل لپاره به پکې اداري تشکیلات په منظم ډول برابريږي.
طالبان وایي چې روان کال به د جلب او جذب هڅې زیاتې کړي او له هرې ممکنې لارې څخه به هڅه وکړي چې دولتي سرتیري له دوی سره یو ځای شي. ”د هرې ولسوالۍ پر رسمي تشکیلاتو سربیره به هلته د دعوت و ارشاد او جلب وجذب کمیسيون څانګه په خاص اهتمام فعاله کیږي او د یادې څانګې د علمي او با تجربه اشخاصو په وسیله به د دښمن له لیکو څخه د تیر ایستل شویو هیواد والو د را ایستلو او له خپل ولس او مجاهدینو سره د یوځای کولو جدي هڅی کیږي. “
دا چې لوستونکو ته د وسله والو طالبانو د نویو پسرلني عملیاتو څرنګوالی په ښه ډول معلوم شي، د طالبانو له لورې خپره شوې اعلامیه کټ مټ نشر ته سپارو.
د پسرلنیو منصوري عملیاتو د پیلولو په اړه د افغانستان د اسلامي امارت اعلامیه
بسم الله الرحمن الرحیم
قال الله تبارک و تعالی: إنهم لهم المنصورون، وإن جندنا لهم الغالبون ) الصافات ( ۱۷۱ – ۱۷۲)
ژباړه : الله جل جلاله فرمايي: په يقيني ډول به له هغوی (مسلمانانو) سره مرسته وشي او همدا زموږ لښکر به (په کافرانو) برلاسی شي.
د جهاد په تیرو پنځلسو کلونو کې که څه هم کفري یرغلګرو ته درانه زیانونه اوښتي او ډیری د ائتلاف ملګري یې زموږ له هیواده د خپلو پوځیانو په ایستلو مجبور شوي دي. مګر د امریکا په مشرۍ ځینې یرغلګر هیوادونه لا هم خپل ظالمانه اشغال ته دوام ورکوي، په جګړه ټینګار کوي، د خپلو اشغالګرو پوځیانو شمیر زیاتوي، درانه بمونه اوروي او د بیلابیلو پوځي ستراتيژیو په طراحۍ سره هڅه کوي زموږ مؤمن او خپلواک اولس د تل لپاره محکوم او د اشغال په زولنو تړلی وساتي، اسلامي امارت او ورسره ټول مجاهد ولس مصمم دی چې د الله تعالی په نصرت په هیواد کې د جوي او موسمي شرائطو په مساعدتوب سره یوځل بیا د بهرنیو متجاوزینو او د هغوي د داخلي ملاتړو په خلاف منصوري جهادي عملیات اعلان کړي.
د اچې د شهیدامیرالمؤمنین ملا اختر محمد منصور رحمه الله تر قیادت لاندې د مجاهدینو په لاس خورا ستر ستر فتوحات وشول، اختطافګراو مفسدین نابود شول، د ډیرو فتنو دروازي وتړل شوي، په سیاسي او اجتماعي برخه کې دپام وړ پرمختګ وشو، د ګڼ شمیر هیوادو متجاوزې لښکرې د جهاد په وسیله ماتې او تیښتې ته اړ ایستل شوې او نورې ډیرې ویاړمنې کارنامې تر سره شوې، الله تعالی ته امید دی چې دشهید امیرالؤمنین په مبارک نامه په تفاؤل سره دمنصوري عملیاتو په جریان کې به هم هیواد دکفارو او دهغوي له پاته شونو، اختطافګرو، بغاتو او نورومفسدینوله وجود او شرڅخه خلاص شي.
دا چې د الله تعالی په نصرت او د افغانستان د مجاهد ولس د بیدریغه سرښندنو له برکته یرغلګر دښمن په پوځي ډګر کې ماتې خوړلې او خپله د دښمن په اعتراف د هیواد تر نیمايي زیاته برخه د مجاهدینو تر کنټرول لاندې ده.
لهذا سږني منصوري عملیات به د اشغال د نورو کلونو په نسبت د نوعیت او تکتیک په بدلون سره په دوو ملکي او پوځي برخو کې همزمان اعلان او پلي کیږي.
لومړی په ملکي برخه کې:
الف ـ د هیواد کومې سیمې چې د دښمن له شتون څخه تصفیه او مجاهدین ورباندې حاکم دي هلته به د اسلامي امارت د شته امکاناتو مطابق ملکي فعالیتونه زیاتیږي او په ټول کوښښ سره به ولس ته دسوکالۍ اوګټي رسولو په بیلابیلو برخو کې رغنده عملیات شروع کیږي.
ب ـ په تصفیه شویو ولسوالیو او سیمو کې به د نظام جوړونې ټول اداري واحدونه فعال او د ولس د اداري، امنیتي او حقوقي موضوعاتو د حل او فصل لپاره به پکي اداري تشکیلات په منظم ډول عیاریږي.
ج ـ د هرې ولسوالۍ پر رسمي تشکیلاتو سربیره به هلته د دعوت و ارشاد او جلب وجذب کمیسيون څانګه په خاص اهتمام فعاله کیږي او د یادې څانګې د علمي او با تجربه اشخاصو په وسیله به د دښمن له لیکو څخه د تیر ایستل شویو هیواد والو د را ایستلو او له خپل ولس او مجاهدینو سره د یوځای کولو جدي هڅی کیږي.
دوهم په پوځي برخه کې:
الف ـ کومې سیمې چې د دښمن له لوثه په مکمل ډول نه دي تصفیه شوې هلته به د د دښمن د ځپلو، وژلو، ژوندي نیولو او له سیمې څخه دهغوئ د ایستلو پوځي طرحې عملې کیږي.
ب ـ د منصوري عملیاتو اساسي ترکیز به پر بهرنیو یرغلګرو، د هغوی د پوځي او استخباراتي ثابتو او سیارو مراکزو او د هغوی د داخلي ملاتړو په له منځه وړلو باندې متمرکز وي.
ج ـ یاد عملیات به د دښمن پر اهدافو له تهاجمي بریدونو سره په څنګ کي د چریکي (خرپ او ترپ) جګړې د تکتیک له مخې د ډله ایزو استشهادي او هدفي بریدونو، نفوذي حملو او تفجیري بریدونو په تر سره کولو د الله په نصرت پرمخ بیول کیږي.
د ـ په منصوري عملیاتو کې به مجاهدین مکلف وي چې د هغو د تنفیذ ساحه حتی الامکان داسي ځایونه او داسي ترتیب او انتخاب کړي چي د عملیاتو په مهال د ولسي خلګو د ځان او مال خونديتوب ته جدي پاملرنه پکي شوي وي.
همداراز د عملیاتو په مهال به په نویو فتحه کیدونکو سیموکې دملي شتمنیو او شخصي ملکیتو نوساتني او اداري واحدونو فعالیدلو ته خاصه توجه کیږي او د دښمن له نیول شویو او ژوبل شویو جنګي افرادو سره به د اسلامي او انساني چلند په کولو سره د هغوی د ژغورنې او بشري حقونو د رعایت خاص خیال ساتل کیږي.
څرنګه چي دثور اتمه د شوروي اتحاد او کمونیزم په مقابل کي زموږ د تیر مقدس جهاد دکامیابۍ اوستر افتخار ورځ ده نو منصوري عملیات به هم ان شاء الله د روان ۱۳۹۶ هجري لمریز کال د ثور د میاشتې په ۸ تاریخ چې د ۱۴۳۸هـق کال شعبان دمیاشتي له لمړۍ او د میلادي ۲۰۱۷ م کال د اپریل د میاشتې له ۲۸ سره سمون خوري، دهیواد په ټولو ولایتونو کي دسهار په پنځو بجو د الله اکبر په ویلو سره د یرغلګرو او د هغوی د ملاتړو پر پوځي تاسیساتو همزمان پیل کیژي، لهذا د ولسي خلګو د ځان او مال د خوندیتوب په غرض له خپلو ټولو هیواد والو څخه هیله کیږي چې د عملیاتو په جریان کي د دښمن له هر ډول پوځي مرکزونو او نظامي تجمعاتو اومضرو اشخاصوڅخه لیري اووسي او په هره برخه کې له خپلو مجاهدینو وروڼو سره لا زیات همکار و اوسیږي. والسلام
د افغانستان د اسلامي امارت رهبري شوری
۱۴۳۸/۸/۱هـ ق ۱۳۹۶/۲/۸هـ ش ـــ 2017/4/28 م
