سرلیکنه
که دیوې خوا په ترکیه کې دانتخاباتو په پای کې د اردوغان او دهغه د ګوند په کامیابیو مسلمانان خوښي ښکاره کوي او شوي انتخابات په ترکیه کې دمسلمانانو د کامیابیو زیری بولي؛ نو دبلې خوا په برما کې روهنګیا مسلمانانو ته په انتخاباتو کې برخه ورنکړل شوه چې مسلمانانو ته یې اندیښنی را پیدا کړي دي، چې څرنګه په روهینګیا یی مسلمانانو باندې دبرما نظامیانو سترګې پټې کړي او په انتخاباتو کې یې ورته برخه ورنګړه . په برما کې 25 کاله پس چې څوکاله پکی پوځیانو واکمني وکړه اولس یی په زیاته اندازه انتخاباتو کې برخه واخسته .
په برما یا میانمار کې چې د اولسوالۍ لپاره انتخابات ترسره شول د ملي لیګ ګوند مشره آنګ سان سوچي د پانګون په ښار کې دانتخاباتو په بهیر کې ولیدل شوه چې خپله رایه یی استعمال کړه خو آنک سان سوچې د خپل خاوند په بهرنی تابعیت لرلو د برما د قانون له مخې واکمنۍ ته ددریدا حق نلري البته کولاي شي د ګوند نور غړي یی دې هدف ته ورسیږي.
دا مهال په برما کې 90 ګوندونه دي چې تقریبا 11 ګوندونه یی د واکمنۍ خوبونه لیدل نورو ګوندونو د لویو ګوندونو سره په ملتیا په اقتدار کې د شرکت په تمه هلې ځلې کولې چې په 664 څوکیو کې 25 څوکۍ غیر منتخب کسانو ته بیلې شوې وې چې د راتلوکې واکمن ګوند سره ائتلاف کولای شي.
په برما کې 3 ملیونو کسانو رایه ورکړیده او هغو کسانو چې رایه يې نه ده استعمال کړې، د برما د واکمنو په وینا مطبوعاتو نده ښکاره کړې او نه مطبوعاتو د برما د مسلمانانو کوم خبریال په تلویزیون کې مرکه خپره کړه چې څرنګه دروهنګیا مسلمانانو ته په انتخاباتو کې برخه ورنګړل شو؟
په برما کې واکمن نظامي چارواکي ادعا کوي چې مطبوعات ازاد دي خو په برما کې په مسلمانانو د زور او ظلم په اړه مطبوعات د نظامیانو له ویرې چوپه خوله شویدي.
دبرما نظامي حکومت دمسلمانانو سره یو ظلم دا اوکړ چې ټوله روهنګیایی سېمه دمسلمانانو په خاطر دانتخاباتو څخه په یوه او بله پلمه محرومه کړه. بل داچې د نورو سیمو څخه یې هم مسلمانانو ته د نومول کیدا حق نه ؤ ورکړی.
که په یوه اسلامی هیواد کې په دومړه اکثریت سره غیر مسلم له انتخاباتو محروم شي او یا دبرما د نظامیانو په څیر چې پر مسلمانانو یې ظلمونه او وحشتونه کوي، د بشر د حقوقو نړیوالې ادارې به څه غوغا جوړه کړې وه او څومره اروپائي تمویل کیدونکو رسنیو به دمسلمانانو پر خلاف تبیلغات پیل کړي وو خو افسوس پدې دی چې دبشر د حقوقو نړیواله اداره ، عرب لیګ ، اسلامی کنفرانس او د سیمي اسلامی هیوادونه دا ټول په برما کې دروهنګیا دمسلمانانو په اړه چوپه خوله ناست دي. دوی به دروهنګیا دمسلمانانو په وړاندې څه ځواب ورکړي؟ او خپل اسلامیت به څرنګه ثبوت کړي؟ د برما دمسلمانانو سره نه د اسلامي نړۍ ، مرسته شته ، نه دعربي هیوادونو او نه د سیمي هیوادنو د مرستي او خوا خوږۍ څه څرک لیدل کیږي.
