(کابل ټکی کام ۱۳۹۶چنګاښ ۷)
راپورونه وايي، امريکا په روانه اوونۍ کې افغانستان ته د جګړې لپاره ۱۵۰۰ امريکايي پوځيانو د راستولو پريکړه کړې.
ځايي رسنيو خبر ورکړی، چې دغه پوځيان د امريکا د کارولينا ايالت د پوځي کمپ د ۸۲ یمې هوايي فرقې د ۳۵۰۰ عسکرو له جملې څخه دي چې افغانستان به لېږل کېږي.
د امريکاغږ د راپور له مخې، ياده شمیره سرتيري به د داعش پر ضد جګړه کوي او د افغان پوځيانو سره به په بېلابيلو برخو کې مرسته هم کوي.
ټاکل شوې وه، چې دا سرتېري پرون سه شنبه افغانستان ته ورسېږي، خو تر اوسه د هغوی د رسېدلو په اړه معلومات نه دي ورکړل شوي.
په افغانستان کې د ناټو ځواکونو عمومي قوماندان جنرال جان نيکلسن د فبرورۍ په مياشت کې د سنا مجلس په استماعيه غونډه کې دغه هېواد ته د نورو امريکايي سرتيرو د رالېږلو غوښتنه کړې وه.
دا په داسې حال کې ده، چې د امريکا ولسمشر ډونالډ ټرمپ د روانې جون مياشتې په لومړيو کې افغانستان ته د نورو عسکرو د لېږلو او د شمیر د زياتولو صلاحیت د دفاع وزير جېمزمتیس ته ورکړ.
امريکا غواړي په افغانستان کې د جګړې ګټلو لپاره خپل زرګونه عسکر اضافه کړي، خو ډیری شنونکي او پوځي چارواکي په دې نظر دي چې د ځواکونو په زياتولو د دغه هېواد شخړې نه هواريږي.
-الماس خدرخېل-
