(کابل ټکی کام ۱۳۹۶چنګاښ ۷)
د بېلابېلو هېوادونو په څو لويو شرکتونو انټرنيټي بريدونه شوي، چې له امله يې دغه شرکتونه اغېزمن شوي دي.
د اوکراين چارواکي وايي، دا بريدونه لومړی له اوکراين څخه پیل شول، چې په پايله کې يې د حکومت انټرنټي شبکې، د بانکونو ويبسايټونه، ستر صنعتي شرکتونه، پوسټي خدمات، د پلازمېنې کييف لوی هوايي ډګر اغېزمن شوي دي.
وروسته بيا ناروې، هند، فرانسې، امريکا، بريتانيا، روسيې او ډنمارک ته هم رسېدلي چې د يو شمير ادارو کمپيوټري فايلونو ته يې قلفونه اچول شوي دي.
دغه راز د کيف د ميترو پيسې راټولوونکی شرکت ځپل شوی او د تېلو يو شمير پمپونو هم خپل فعاليت درولی دی.
ویل کېږي د بریتانيې WPP شرکت، د روسيې (روس نفت) د تېلو شرکت، د ډنمارک سمندري مرسک شرکت زيانمن شوي دي.
بريدګرو له يادو شرکتونو د پيسو غوښتنه کړې ده.
د فرانسې رسنيو هم په يو شمير شرکتونو د انټرنيټي بريدونو د اغېزمنېدلو راپورونه ورکړي دي.
چارواکي وايي، د انټرنیټي بریدونو د کابو کولو لپاره يې پراخې هڅې پيل کړي دي.
شاوخوا دوه مياشتې وړاندې بریدګرو د رنسموير په نامه د يوه سافټوير په واسطه ۷۴ هېوادونو کې ۴۵۰۰۰ بریدونه وکړل، چې له امله يې عامه خدمات وځنډېدل او ګډوډي يې رامنځته کړه.
بريدګر ډيری وخت داسې سافټوير يا وايرس د لويوشرکتونو، ادارو، بانکونو کمپيوټرونو ته لېږي چې فايلونه یا دوسيې بندوي او بيا يې له کاروونکو د شفر د خلاصولو لپاره نغدې پيسې غواړي.
-الماس خدرخېل-
