له ارګ څخه خپره شوې خبرپاڼې په وینا چې دواړو ولسمشرانو د یو لړ مهمو مسایلو ترڅنګ د ۷ موافقتنامو په لاسلیک هم سره سلاشول.
دواړو لوریو د خپل منځي تجارت د لا پیاوړتیا په هکله هوکړه وکړه.
د ترکمنستان جمهور رئیس قربان قلي بردي محمدوف له غني سره په یو ګډ کنفرانس کې وویل چې هېواد به یې د اقتصادي همکاریو ترڅنګ له افغانستان سره فرهنګي او بشري همکارۍ هم زیاتې کړي، ځکه ترکمنستان او افغانستان ګډ تاریخي، کلتوري، هنري ارزښتونه او مشترکات سره لري.
په دغه کتنه کې د ترکمنستان جمهور رئیس د افغانستان جمهور رئیس ته په ترکمنستان کې ترسره کېدونکو اسیايي رزمي لوبو او سیالیو کې د ګډون بلنه ورکړه او هیله یې څرګنده کړه، چې دا سفر به د دواړو هېوادونو لپاره ښې پایلې ولري.
افغان ولسمشر هم له خپل ترکمن سیال څخه مننه وکړه.چې نوموړي ته یې په خاصو مراسمو ښه راغلاست ووایه او دا چې د اقنیی د بندر د پرانیستې لپاره افغانستان ته راغلی ؤ.
افغانستان او ترکمنستان د همکاريو اووه سندونه هم لاسليک کړل. چې پکې د ۲۰۱۸ او ۲۰۱۹ کلونو لپاره د دواړو هېوادونو د بهرنيو چارو وزارتونو ترمينځ د سياسي او ډيپلوماټيکو همکاريو سند،
د غاليو د صنعت، لېږد را لېږد، د دواړو هېوادونو په پولو کې د ريل پټلۍ، جوزجان او بادغیس ولايتونو ته له ترکمنستانه د برېښنا د لېږد، د جوزجان او د ترکمنستان د مختومقلي پوهنتونونو ترمينځ د همکاريو او د دواړو ولسمشرانو د بيانيو سند هغه اسناد دي چې د افغانستان او ترکمنستان د لوړپوړو چارواکو له لوري لاسليک شول.
