(کابل ټکی کام ۱۳۹۶چنګاښ ۲۰)
د افغانستان د سولې عالي شورا مشر کريم خليلي وايي، چې د وسله والو مخالفينو سره د نويو خبرو په پيلولو سره دې د هغوی يولړ سالمې غوښتنې ومنل شي.
نوموړي چې د یادې شورا عمومي غونډې ته يې وينا کوله وویل، ريښتونې سوله هغه وخت راتلی شي، چې د وسله والو طالبانو يو لړ غوښتنو ته مثبت ځواب وويل شي.
هغه زياته کړه، چې دوی د سولې په بهير کې طالبانو ته د تسليمېدو په سترګه نه ګوري او په وينا يې چې (بايد د طالبانو نظر مطالعه کړو او له يوې نوې تګلارې سره چې په کې د طالبانو په ګډون چې زمونږ جدي مخالفين دي او نورې کوچنۍ ډلې، د ټولو غوښتنو ته مثبت ځواب وويل شي).
د سولې عالي شورا په ننۍ غونډه کې په نوې جوړه کړې ستراتيژۍ له خبرو او بحث وروسته د دغې شورا مشر کريم خليلي نوې ستراتيژي تائيد کړه.
د يادې شورا د دارالانشا مشر اکرم خپلواک وويل، چې د سولې لپاره نوې ستراتيژي به د راتلونکې شنبې په ورځ له رسنيو او خلکو سره شريکه کړي.
شنونکي په دې باور دي، چې د دغې شورا د سولې د خبرو اترو شعارونه تر ډيره سمبوليکه بڼه لري او وايي چې په هېواد کې سوله د امريکا او حکومت په لاس کې ده هر وخت چې وغواړي نو د افغانستان شخړه یوطرفه کولی شي.
د دوی په خبره، د سولې د نه راتلو اصلي عامل بهرنيان دي، د جګړې او سولې راتلو واک هم د هغوی په لاس کې دی او زياتوي چې د سولې عالي شورا په تشو شعارونو دغه سوله ممکنه نه ده.
طالبانو تر دې مخکې په ځلونو ويلي، چې د بهرنيانو په شتون کې په هېواد کې د سولې خبرو ته تيار نه دي او هرکله چې بهرني قوتونه له افغانستانه د وتلو مهالويش وټاکي، دوی به هم له افغان حکومت سره د سولې خبرو لپاره تياری ونيسي.
-الماس خدرخېل-
