(کابل ټکی کام ۱۳۹۶ زمری ۱۱ فرید افغان)
وروسته له هغه چې ځینې راپورونه خپاره شول چې امریکا اواړي افغان جګړه شخصي امنیتي کمپنیو چې ځینو هیوادونو ته کرایي جنګیالي استوي وسپاري.
چې له یوې خوا به امریکایي پوځ له تلفاتو ورکولو خلاص وي، او له بل لوري به د جګړې د ناکامۍ په صورت کې هم ټوله پړه د همدې کمپنیو په غاړه وي.
څو ورځې وړاندې سیاسي کارپوهانو او د ولسي جرګې ځینې غړو هم د یادو جګړه مارو راتګ د اندیښنې وړ بللی ؤ.
طالبانو په اونیزه تبصره کې چې د دوی رسمي نظر څرګندوي ویلي چې افغانستان کې د امریکایانو اوسنی حالت د اوبو وړي سړي سره تشبیه کړی چې هر بوټي ته لاس اچوي خو ګټه نه ورته کوي.
طالبانو ویلي چې ‹‹ دا د افسوس خبره ده چې د کابل اداره خپله بقا د ولس د ملاتړ په ځای د یرغلګرو په رحم او کرم کې ویني، خپل ولس وژني او یرغلګرو ته بلنه ورکوي چې د هیواد خپلواکي او شتمنۍ تروړلو ته دوام ورکړي››
باید وویل شي چې په ۲۰۱۲ کال کې په افغانستان کې شاوخوا یو لک او لس زره ملکي او نظامي امریکایي قراردادیان میشت وو.
چې اوس مهال پنځه ویشت زره قراردادیان لا هم شتون لري.
طالبانو امریکایانو ته په خطاب کې ویلي چې افغانستان بې څښتنه مال ندی او د ظلم او استبداد د غځونو هڅه دې نکوي.
‹‹موږ امریکایانو ته وایو چې هیڅکله په ظلم، بې عدالتۍ او د بلیک واټر او نورو خصوصي شرکتونو په اجرتي قاتلانو د افغانستان جګړه نشي ګټلی یوازې جګړه به اوږده کړي چې دوی ته به هم د سر او مال زیان واړوي. باید پوه شي چې افغانستان بې څښتنه مال نه دی. دلته د هیواد د اسلامي معتقداتو او خپلواکۍ د لارې اتلان موجود دي. د الله عزوجل په نصرت به هیڅکله پرې نږدي چې پدې ویاړمنه خاوره د یرغلګرو باداري ټینګه شي. ان شاءالله››
طالبانو افغان ولس یو ځل بیا د امریکایانوپه ضد جهادي فعالیتونو ته هڅولی او په وینایي چې لږ نور مقاومت دې هم وکړي دښمن یې راپرزولی دی
‹‹اوس دښمن روحیه بایللې او ټول پلانونه یې ناکام دي.››
د یادونې وړ ده چې د ترمپ په مشرۍ د پراخو جنجالونو له کبله امریکایي اداره له نیم کال وروسته لا هم د افغانستان په هکله پوره جامعه تګلاره نلري.
امریکایان د سرتیرو په وتلو، د بلک واټر کرایي جنګیالیو په رالیږلو او د نورو اروپایي هیوادونو څخه د عسکرو د غوښتلو په ګډون په ډیرو لارو غور کوي.
