دکتور کفايت الله وردګ
د رسول الله صلی الله علیه وسلم شفاعت
رسول الله صلی الله علیه وسلم فرمايي: چا چې په ما باندې لس ځله په سحر کې او لس ځله په ماښام کې درود وويلو هغه ته به زما شفاعت ورسيږي. رواه الطبراني
نکته: د درود په اړه وروسته يو تفصيلي بحث را روان دى هلته به دا هم راشي چې صحابه وو رضی الله عنهم له رسول الله صلی الله علیه وسلم نه پوښتنه کوله چې مونږ درود څنګه ووايو نو رسول الله صلی الله علیه وسلم ورته مختلف الفاظ ښودلي دي د مثال په ډول هغه درود چې مونږ يې په مانځه کې په دوهمه قعده کې وايو چې درود ابراهيمي ورته وايي نو که هغه درود څوک په سحر او ماښام کې لس لس ځله ووايي نو هم دې فضيلت ته رسيږي او نور الفاظ به يې مونږ لږ وروسته د همدې لړۍ په بله کړۍ کې ستاسې مخې ته کېږدو.
جنت ته د ننوتلو لاره
رسول الله صلی الله عليه وسلم فرمايي: چا چې په سحر کې او يا په ماښام کې وويل:
اَللَّهُـمَّ أَنْتَ رَبي لَا إِلَهَ إِلَّا أَنْتَ خَلَقتَنيْ وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ اَعُوْذُ بِكَ مِنْ شَرِ مَا صَنَعْتُ أَبُوْءُ لَكَ بِنِعْمَتِكَ عَلَيَ وَأبُوْءُ بِذَنْبِيْ فَاغْفِرْ لي فَإنَه لَا يَغْفِرُ الذَنُوْبَ إِلَا أَنْتَ. رواه احمد و ا بو داود
بيا په دغه ورځ (چې ده يې په سحر کې پورتنۍ دعاء ويلې وه) او يا په دغه شپه (چې ده يې په ماښام کې پورتنۍ دعاء ويلې وه) وفات شو نو هغه به جنت ته ننوزي.
لس ځله رحمت
رسول الله صلی الله علیه وسلم فرمايي:
مَن صَلَى عَليَّ وَاحِدَة ، صَلَى الله عَلَيهِ عَشر صَلَوَات ، وَ حطَ عَنْه عَشر خَطيْئَات ، وَ رَفَعَ لَه عَشر دَرَجَات. صححه الالباني
ترجمه : چا چې په ما باندې يو ځل درود وويلو الله جل جلاله به ورباندې لس ځله رحمت نازل کړي او لس ګناهونه به ترې لرې کړي او لس درجې به ورته پورته کړي.
رسول الله صلی الله علیه وسلم ته نزديکت
رسول الله صلی الله علیه وسلم فرمايي:
أَوْلى النَاسِ بي يَوْمَ القِيَامَة أَكْثَرُهُمْ عَليَّ صَلَاة . رواه ابن حبان
ترجمه : ماته به د قيامت په ورځ هغه کس ډېر نېږدې وي چې په ما يې درود زيات ويلى وي.
بې شماره نېکيانې
د حضرت عبادة بن صامت رضی الله عنه څخه روايت دى هغه فرمايي رسول الله صلی الله علیه وسلم فرمايل:
مَنْ اسْتَغْفَرَ لِلْمُؤْمِنِيْنَ وَالمُؤْمِنات ، كَتَبَ اللهُ لَه بِكُلِ مُؤمِنٍ وَمُؤْمِنَةٍ حَسَنَة
ترجمه: چا چې د مؤمنينو سړيو او مؤمناتو ښځو لپاره بښنه وغوښته الله جل جلاله به د هر مؤمن او مؤمنې په سر باندې ده ته يوه نيکي وليکي.
راځئ چې په شریکه ووایو : اَللَّهُـمَّ اغْفِرْ لِلْمُؤْمِنِيْنَ وَالْمُؤْمِنَاتِ الْأَحْيَاءِ مِنْهُمْ وَالْأَمْوَاتِ
یعني (اې الله ته بښنه وکوې مؤمنانو نارینه وو او زنانه وو ته هغه چې ژوندي دي او هغه چې وفات شوي دي). نور بیا ان شاء الله
