سرليکنه
دوه ورځې دمخه د سرپل ولايت صياد ولسوالۍ اړوند د ميرزاولنګ سيمه طالب وسله والو له دولتي ځواکونو ونيوله. د کابل په رسنيو کې غوغا جوړه شوه چې ګوندې طالب وسله والو د يادې سيمې خلک نيولي او وژلي یې دي. په کابل کې يو شمېر رسنۍ اوس يوازې د تبليغاتو دنده پر مخ بيايي، خپل رسنيز رسالت یې پرېښى دى، تبليغاتو ته د راپورونو بڼه ورکوي چې تر ډېره حده پرې زيات شمېر لوستونکي پوهېدلي او بې باوره شوي دي.
طالب وسله والو تېره سه شنبه دا سيمه له دولتي ځواکونو څخه په ٤٨ ساعتونو کې ونيوله. کومه سيمه چې ونيول شي، د هغې سيمې اوسېدونکو ته بنديان نه ويل کېږي او هم که د جګړې له ډګره بل ځای ته وکوچېږي، هغه بنديان نه، بلکې د جګړې له ډګره تللي بلل کېږي.
د ميرزاولنګ سيمه د سرپل ولايت صياد ولسوالۍ کې واقع ده او له مرکزه نږدې شل کيلومتره فاصله لري. د جګړې له امله له کورونو وتلي وګړي یې بيا خپلو کورونو ته ولاړل؛ خو حکومت او يو شمېر رسنيو تبليغ کړه چې طالبانو په ياده سيمه کې تر ١٥٠ زیات کسان وژلي او نږدې دوه نيم سوه یې برمته کړي وو چې برمته شوي کسان یې بېرته راپريښي دي.
دا مهال د هېواد په ١٤ ولاياتو کې جګړې روانې دي؛ خو دا چې ارګ ولې د سرپل ولايت ميرزاولنګ سيمې ته پاملرنه وکړه، دا راز شايد يواځې له ارګ سره وي. ځکه په ١٤ ولاياتو کې د روانې جګړې د عملياتو پرېکړې دفاع او د کورنيو چارو وزارتونه کوي، خو د دې سيمې د عملياتو پرېکړه ارګ وکړه.
تېره ورځ په ارګ کې د اشرف غني په مشرۍ، د سرپل ولايت د ميرزاولنګ سيمې د بيا نيولو او پرې د عملياتو پرېکړه له څو نظاميانو سره په ګډه غونډه کې وشوه. دا دی اوس په ميرزاولنګ د امنيتي پوځونو عمليات روان دي.
له هغې ورځې چې له کندهاره کابل ته مرکزيت رانقل شوی دی او څو نظامونو په ارګ واکمني وکړه، په ارګ کې د هېواد د پرمختګ او د نورو هېوادونو له مشرانو سره د هر اړخيزو اقتصادي پياوړتياو پرېکړې کېدې، د يو هېواد له سفير او يا وزير سره به د دوستۍ تړونونه لاس ليک کېدل. هغه وخت ارګ ته دارالامن ويل کېده؛ خو اوس به ورته دارالحرب ويل کېږي. ځکه: د يوې سيمې د نيولو پرېکړه په ځای د دې چې د ولايتي چارواکو يا ولسوال له خوا وشي، اشرف غني خپله د يوې غونډې په رابللو سره د ميرزاولنګ د سيمې د نيولو پرېکړه وکړه.
د سرپل ولايت چارواکو خپله اعتراف کړی دى چې د ميرزاولنګ د سيمې له جګړې تللي وګړي خپلو کورونو ته راستانه شوي دي؛ خو دا چې اوس پرې امنيتي ځواکونو عمليات پيل کړل، هغه راستانه شوي وګړي به په عميلاتو کې ووژني او بيا به یې پړه پر وسله والو طالبانو وراچوي. د سيمې د نيولو لپاره لېږل شوي ځواکونه خو به په خلاص مټ هر ډول درنه او سپکه وسله کاروي، ځکه چې د دې سيمې د نيولو پرېکړه په ارګ (دارالحرب) کې شوې ده.
که اشرف غني په ارګ (دارالحرب) کې له وسله والو څخه د سيمو د خلاصون پرېکړې کوي، نو بيا دې د هېواد له هر ولايت څخه د قومونو علماء، سياسي او قومي مشران را وغواړي؛ له امريکا څخه دې د اشغال شوي هېواد د ژغورلو پرېکړه وکړي چې هيواد له يرغلګرو وژغورل شي.
اشرف غني بايد له خپلو سياسي او نظامي مشاورينو سره په مشوره، له ټرمپه وغواړي چې په نوې ستراتيژۍ کې له افغانستانه د خپلو پوځونو د وتلو مهالوېش وټاکي، څو له طالب وسله والو سره د مذاکراتو لپاره زمينه برابره کړل شي. څه وخت چې له هېواده د بهرنيو پوځونو د وتلو مهالوېش اعلان کړل شي، هغه وخت به له طالب وسله والو سره د مذاکراتو د کاميابۍ او سولې څرګ راښکاره شي.
اشرف غني بايد له ارګه دارالحرب نه، دارالامن جوړ کړي او له هېواده د بهرنيو پوځونو د وتلو په لارو چارو دې په ارګ کې له خپل ولس سره مشورې وکړي.
