د ۲۰۰۱ز کال د سپټمبر پر یوولسمه په امریکا کې نا معلومه الوتکو د نیویارک څو ودانۍ ونړولې او زرگونه خلک یې ووژل. د امریکا د هغه وخت ولسمشر جورج ډبلیو بوش له پېښې وروسته وویل، چې دغه کړنه په افغانستان کې د القاعده تنظیم ترسره کړې او پر افغانستان یې د یرغل هوډ وکړ.
د سپټمبر له پېښې شپاړس کلونه تېر شول. دلته زرگونه امریکايي او د ناټو عسکر راغلل او تر ۲۰۱۴ کال پورې یې په افغانستان کې خونړۍ جگړې وکړې. امریکايي او د ناټو عسکرو زرگونه افغانان بې گناه شهیدان کړل، زرگونه یې د گوانتنامو، بگرام، کندهار او د څرخي پله زندانونو کې بندیان کړل او زرگونه یې معلول کړ. امریکا پر افغانانو هېڅ ترحم ونه کړ. زموږ ودونه، جنازې، خیراتونه، حشرونه او د افغان حکومت پوځیان هم بمبار کړل او دلته یې یوه نیمه لسیزه خونړۍ جگړه وکړه.
افغانان هم کرار ناست نه وو؛ بلکې طالبانو هم د زرگونه امریکايي او ناټو عسکرو تابونه امریکا ته د افغانستان د جگړې په ډالۍ کې ورکړل او زرگونه نور یې معیوب او معلول کړل.
دغه خونړۍ جگړه اوس هم روانه ده او هره ورځ لسگونه افغانان مري. زرگونه بې کوره شوي او لکونه د جگړو له امله کډوال شوي دي.امریکا چې چا پسې راغلې وه، هغه یې هم د افغانستان په خاوره کې پیدا نه کړ، بلکې یوه لسیزه وروسته یې په ایبټ اباد کې شهید کړ.
د سپټمبر د یوولسمې دواړه خوا افغانان مري او د نن ورځې غوندې کمې داسې ورځې راشي، چې بهرنیو عسکرو ته مرگ ژوبله اوښتې وي؛ بلکې هره ورځ د جگړې په دواړو خواوو کې افغان مري او افغانې میندې بې زویه کېږي.
د امریکا مخکېني ولسمشر بارک اوباما ژمنه کړې وه، چې د افغانستان جگړه به پای ته رسوي؛ خو اوباما په اته کلونو کې پر دې ونه توانېده، چې دغه خونړۍ جگړې ته د پای ټکی کېږدي او خپل پوځیان له افغانستان نه وباسي.
د امریکا نوي ولسمشر ډونلډ ټرمپ هم پر جگړه تمرکز وکړ او داسې ښکاري، چې دغه جگړه به نورو څو کلونو ته هم وغځول شي او له افغانانو به یوازې د سون د توکو گټه واخیستل شي.
د سپټمبر یوولسمې موږ ته بغیر له مرگ او ژوبلې نور هېڅ رانه کړل. هېواد مو د اته څلوېښت کفري هېوادونو له خوا اشغال شو او زموږ ټولې ازادۍ سلب شوې. پر موږ یې خپل لاسپوڅي مقرر کړل، چې تراوسه ددغه دردونو رنځ گالو.
د جگړې دواړو خواوو ته پکار ده، چې د جگړې په پای ته رسولو فکر وکړي. امریکا دې خپل پوځیان له افغانستان نه اوباسي او د طالبانو یوازېنۍ دوه غوښتنې د اسلام نظام حاکمول او د امریکايي عسکرو وتل دې ومنل شي.
دغه جگړه دې نوره ودرول شي، گنې امریکا به په خپل تاریخ کې د ویتنام نه وروسته دلته دویمه شرموونکې ماتې وخوري. ان شاء الله
