خالد رعد
زمونږ ګران هيواد له نن څخه ۱۶ کاله وړاندې د امن او سولې نغد چغد مثال و، هغه مهال د نړۍ د کوم زبر ځواک لاس زموږ د ملت په خوا نه و راغځیدلی او نه هم په نړۍ کې امریکایي مداخلو پراختیا موندلې وه، همدا وجه وه چې د نړۍ په تقريبا ټولو هيوادونو کې آرامه فضا حاکمه وه. ۱۶ کاله وړاندې دغه شپې ورځې وې چې د امريکا پټې ارادې لوڅې او د ۱۱م ستمبر واقعه ورته لويه بهانه شوه، تر څو افغانستان اشغال او اسلامي نظام ونړوي. د افغانستان د اشغال له پيل سره په ګرده نړۍ د نا ارامۍ څپه راوالوتله او دا دی ۱۶ کاله وروسته نژدې ټولو هيوادونو د نا امنۍ تراخه وڅکل؛ ځکه خو وايو چې د دې بدمرغيو لامل امريکا او د دوی متحدين دي.
د خواشينۍ ځای دا دی چې دلته لا هم داسې څوک شته چې امريکا او ملګري يې د سولې او ثبات ارمانجن او يوازيني راوړونکي ګڼي، دوی لا هم د امريکا په دې ناروا نا خبره دي چې سوله او امن يې په ګرده نړۍ کې زندۍ کړل، او يا په شعوري توګه د ځينو امتيازاتو تر لاسه کولو په موخه د اشغالګرو ټول کړه وړه بالعکس تعبيروي.
دې خلکو ته بايد ورپه ياد کړو چې که فکر وکړئ، امريکا چې په کومه ورځ يو هيواد ته لاس غځولی، د هغه هيواد ولس تر ننه د سولې او امن په ارمان دی، دوی د همدې نوم په کارولو ملتونه ايل کوي خو حقيقت کې دوی خپله د سولې او امن بيخ کيندونکي دي.
که زمونږ له هيواد نه علاوه نورې نړۍ ته نظر وکړو او عراق، ليبيا، سوريه، مصر او… د مثال په ډول را واخلو، وبه ګورو چې کله په دې خاورو د امريکا قدم ايښودل شوی، د جګړو او ناارامۍ ډګرونه يې ګرځولي او د امريکا په شمول د دوی د متحدينو له پريمانه پوځي ځواک سره سره د يادو هيوادونو ولسونو د خوشحالۍ فضا تر نن ورځې بيا ونه ليدله.
په دې ټولو او په ځانګړي ډول زمونږ په هيواد کې د راپيل شويو بدمرغيو لوی سبب د امريکا لاس وهنې او اشغال دی؛ ځکه هيڅ ملت نه غواړي د بل له لوري يې هيواد اشغال او ولس، دولتي ادارې او آن تعليمي او اقتصادي چارې يې د بل د اختيار شي، دوی د خپل وجدان له مخې امريکا ته هم اجازه نشي ورکولی او په وړاندې يې وسلوال مقاومت ته مخ کوي، او امريکا بيا د خپل غرور له مخې دا نشي منلی چې د اهدافو په مخکې يې څوک خنډ شي.
زمونږ هيواد کې د بيلابيلو ډلو راپيدا کول او بيا د هغوی لپاره تبليغاتو ته په پراخه پيمانه رسنۍ وقف کول هم د جګړه خوښې امريکا له هغو تکيتکونکو څخه دی چې په عملي کولو سره يې غواړي دا هيواد د جګړو ډګر او په نتيجه کې د خپلو پوځونو ځاله وګرځوي.
د امريکا د اشغال په سيورې کې د سولې په تمه خلک که وپوښتل شي چې همدا څو ورځې وړاندې د پروان په بګرام ولسوالۍ کې د طيبه کلمې توهين اميزه انځورونه پاشل څه معنی؟ ايا امريکا په دې نه پوهيږي چې دغه عمل د د دې ولس غوسه پاروي؟ ايا دوی خبر نه دي چې دغه ولس د دې مقدسو کلماتو د ساتنې لپاره له مال او ځانه تيريږي؟. دغه خلک به د دې ځواب ورکړای شي؟
که امريکا سوله خوښې او سوله يو ملت ته په تحفه کې ورکونکې وای؛ نو دغسې شر انګيزه اعمال د څه لپاره؟
دغه له شريرې امريکا د خير غوښتنکي بايد خپل سر ګريوان ته کړي او په نړۍ د ۱۶ کلونو تيرو شويو شپو ورځو ته او په هغو کې رامنځته شويو زړه بوږنونکو پيښو ته ژور نظر وکړي. دوی که رښتيا هم د وطن او هيوادوالو په ناخوالو درديږي؛ نو بې له شکه به ډير ژر پورتنې حقيقت ته ورسيږي، او که يوازې د ډالري معاشونو يا عياشيو په لټه وي او دين، هيواد، ملت او ارزښتونه ورته بابيزه معلوميږي؛ نو لوری يې معلوم دی.
