کیسه ګۍ(سړیتوب)

کابل ټکی کام ۰۸لېندۍ/۱۳۹۴، ژباړه: حمدالله «حلیمیار»
دوولس کلن بوټ رنګونکی  ماشوم د شیریخو دکان ته راننوت، یوه چوکۍ یې را کش کړه او مېز ته مخامخ کېناست، د دکان کارکونکی راغی، ماشوم ورته وویل: چاکلېټو والا شیر یخ په څو دی؟
کارکونکي ورته وویل: پنځه دېرش افغانۍ!
ماشوم له جېب څخه ټول نوټونه را وایستل، شمار یې کړل او بیا یې کارکونکي ته وویل: ساده یې په څو دی؟
کارکونکي په غوسه ورته وکتل او زیاته یې کړه: ساده یې پنځه ویشت افغانۍ، ژر شه! وایه کوم یو راوړم او که…
هلک ورته وویل: ساده راوړه!
کارکونکی د شیریخو پلېټ پر مېز په زوره کېښود او نورو ګیراکانو ته ورغی، شېبه وروسته چې کارکوونکی د مېز پاکولو ته راغی چې پلیټ یې را جګ کړ حالت یې بدل شو، سترګو کې یې اوښکې ډنډ شوې، پر خپل سلوک چې له ماشوم سره یې کړی وو سخت پېښمانه شو.
څه ګوري؟!
ماشوم تر پلیټ لاندې یو لسګون د کارکونکي لپاره انعام اېښی دی.
کارکونکي ته ور یاد شو چې ماشوم پنځه دېرش افغانۍ درلودلې مګر د دې پر ځای چې شیک چاکلېټ والا شیریخ وخوري ساده یې وخوړ، او پاته روپۍ یې ده ته په ځواني کې پرېښودې.