عبدالغفور خليلي
نن سبا د فتنو دور دى ، شيطان د فتنو دومره جالونه خواره کړي ، چې د هغو نه بچ کيدل او خپل ايمان ساتل د مومن لپاره يو ستونزمن کار دى ، هر لور ته عرياني ، فحاشي او بې حيايي خوره ده ، حتي چاپي او غير چاپي رسنيو ډير وخت همدغو ډرامو او لوڅو سريالونو ته ورکړى دى ،
د فحاشي او بې حيايي په دې سيلاب کې که څوک خپل ايمان وساتي ، هغه به په يقيني توګه مجاهد وي ،
په دې برخه کې تر ټولو پراخه ، لويه او مهمه ونډه تلويزون او وي سي آر اخستې ده ، دې الاتو له هر کورنه سينما جوړه کړې ده ، د شريفو خلکو کورونه هم له دې لعنت څخه خوندي پاتي نه دي ،
الله تعالى په قران کريم کې فرمايي:
إِنَّ الَّذِينَ يُحِبُّونَ أَن تَشِيعَ الْفٰحِشَةُ فِى الَّذِينَ ءَامَنُوا لَهُمْ عَذَابٌ أَلِيمٌ فِى الدُّنْيَا وَالْءَاخِرَةِ ۚ وَاللَّهُ يَعْلَمُ وَأَنتُمْ لَا تَعْلَمُونَ [سُوۡرَةُ النُّور : 19]
په یقیني توګه، كوم كسان چي د مؤمنانو په ډله کښي د بد لمنۍ خپرول خوښ ګڼي، هغوى په دُنيا او اخرت کښي د دردناك عذاب وړ دي. الله پوهیږي او تاسي نه پوهېږئ.
دا ډرامې او سريالونه د کور او ټولنې ته ډير زيان اړوي ، لومړى خو دا چې وخت ضايع کوي ، ممکن د ځينو خلکو په نظر کې د وخت څه قدر نه وي ، حالانکه وخت هغه نعمت دى چې له ضياع وروسته نه راګرځي ، رسول الله صلى الله عليه وسلم فرمايي : ( نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ الصِّحَّةُ وَالْفَرَاغُ )( من صحيح البخاري: عن ابن عباس )
دوه نعمتونه داسې دي ، چې اکثره خلک ورڅخه غافله دي ، هغه صحت او فراغت (وخت) دي ،
او په فاطر سورت کر الله تعالى فرمايي ( وَهُمْ يَصْطَرِخُونَ فِيهَا رَبَّنَآ أَخْرِجْنَا نَعْمَلْ صٰلِحًا غَيْرَ الَّذِى كُنَّا نَعْمَلُ ۚ أَوَلَمْ نُعَمِّرْكُم مَّا يَتَذَكَّرُ فِيهِ مَن تَذَكَّرَ وَجَآءَكُمُ النَّذِيرُ ۖ فَذُوقُوا فَمَا لِلظّٰلِمِينَ مِن نَّصِيرٍ [سُوۡرَةُ فَاطِر : 37]
هغوى به هلته فرياد واويلا وکړي چي: اې زموږ ربه! موږ له دې ځايه وباسه چي ښه عمل وکړو، نه هغسي عملونه چي پخوا مو كول – (ځواب به ورکړل شي): ايا موږ تاسي ته دومره عمر نه و درکړی چي كه چا په هغه کښي عبرت اخيستل غوښتلای، نو عبرت یې اخيستلای شوای؟ – او تاسي ته وېرونكى هم درغلى و. نو اوس خوند وڅكئ، دلته د ظالمانو كوم مرستندوی نشته.
دوم لوى زيان يې ټولنې ته دا دى ، چې ځوانان او ماشومان بې لاري کوي ، کوم څه چې دوى په سريالونو کې وويني هغه بيا په خپل حقيقي ژوند کې عملي کوي ، که په سريالونو کې جنګ جګړا وي ، دوى هم په خپل حقيقي ژوند کې د هغوى تمثيل کوي ، که په سريالونو کې د غلا او ډاکې منظرونه وي ، دوى غلا او ډاکې پيلوي ، او که د عاشقۍ کيسه وي ، نو دوى هم د عشق جنګ کوي ،
نن زمونږ په ګران هيواد کې چې کوم واردات کيږي ، دا ټول د همدې سريالونو پايله ده ،
دا د ټولو مسٶليت دى ، چې په خپله هم له دې ګنده لعنت څخه ځان وساتۍ ، خصوصا مور او پلار دي د خپل اولاد ژوند په دې سريالونو ښودلو سره نه بربادوي ، ځکه د مور او پلار څخه به د اولادونو په اړه هم پوښتنه کيږي ، چې هغوى دې چيرته استعمال کړو ، تا دهغوى وخت په کوم ځاى کې لګولى وو ، تا هغوى ته څه علم ورښودلى وو ، ايا تا هغوى ته د دين نصيحت کړى وو ،
افسوس د هغه مور او پلار په حال باندې ، کوم چې په خپلو اولادونو باندې ډرامې او سريالونه ګوري ،
اى مسلمانانو ، له دې ډرامو او سريالونو نه خپل ځان او خپل اولادونه محفوظ وساتۍ ، په دې کې ستاسو او ستاسو د اولادونو د دين او دنيا تباهي ده ،
په دې سره د انسان زړه له دين نه غافله کيږي ، مرګ او قبر ورڅخه هيريږي ، چې دا د دواړو جهانونو ذلت دى .
