د «ISI» لاس!/ هېواد ریان

یادونه: زه د پاکستان د استخباراتي شبکې پلوي نه کوم. زموږ چارواکي باید افغانستان ته د افغانانو له لید لوري وګوري؛ نه د امریکایانو له لید لوري.

که دلته د چا پر سر درد شي، که د چا کمپیوټر خراب شي، که د چا پیسې ورکې شي، که موټر ترې څوک وتښتوي، که د چا په ټېلفون کې فېسبوک کار نه کوي او که له کومې بلې ستونزې سره مخ شي؛ نو ملګري یې ورته حتماً وايي چې په دې د اې ایس اې لاس دی.
په افغانستان کې اوس دا معمول ګرځېدلی، چې له هرې پېښې وروسته امنیتي چارواکي ووايي، چې دغه پېښه په پاکستان کې پلان شوې وه او د اې ایس اې په همکارۍ شوې ده. د کورنیو چارو او دفاع وزراتونه او د ملي امنیت ادارې ویاندویان تل په خبري کنفرانسونو کې د هرې پېښې د پلان ځای هم رسنیو ته ښيي؛ خو له دومره معلوماتو سربېره بیا هم د ارګ په څو مترۍ کې پېښه کېږي او دوی له پېښې وروسته خبرېږي.استخباراتي ادارې د پېښو مخه نیسي؛ خو دوی په دومره سپین سترګۍ وايي چې پېښه په پلاني ځای کې طرحه شوې وه او په پېښه د اوښتې مرګ ژوبله کره شمېر رسنیز کوي.

امریکا، ناټو او د افغان دولت نور نړیوال ملګري له افغانستان سره ډېره مرسته له امنیتي ځواکونو او د امنیت اړوند اورګانونو سره کوي؛ خو بیا هم د یوې عادي پېښې مخه نه شي نیولی او د پېښې وروسته بیا «کره اسناد» اسلام اباد ته وړي.

تېره اوونۍ طالبانو په کابل کې د کورنیو چارو وزارت په پخوانۍ ودانۍ کې موټر بم برید وکړ، چې ۱۰۵ تنه پکې ووژل شول او له ۲۳۵ ډېر پکې ټپیان شول. په رسنیو کې یوه غوغا د ملکي خلکو د مرګ ژوبلې وه، چې په دغه برید کې وژل شوي ډېری ملکي وګړي دي؛ خو برید داسې ځای کې شوی و، چې هلته ملکي وګړي بېخي پرېښودل کېږي نه.

 د کورنیو چارو وزیر ویس احمد برمک او د ملي امنیت رییس معصوم ستانکزی دواړه اسلام اباد ته ولاړل او د شوې پېښې اسناد یې پاکستاني چارواکو ته وسپارل. دواړو وویل چې پاکستان به له پوره ژمنې سره افغانستان خلک استازي راولېږي او نن د پاکستان استازي هم راغلل.

همدا نن د دفاع وزارت اعلان کړی، چې د هېواد په بېلابېلو ولایتونو کې یې ۵۰ طالبان وژلي. د دفاع، کورنیو چارو او د ملي امنیت ریاست هره ورځ د لسګونه طالبانو د نیول کېدو او وژل کېدو خبرونه ورکوي. دغه ټول نیول شوي او وژل شوي په پاکستان کې نه وي؛ بلکې د هېواد په بېلابېلو ولایتونو کې شوي وي؛ خو نه د طالبانو شمېر کم شو او نه پاکستان لاس تړلي طالبان افغان حکومت ته وسپارل.

دا چې طالبان د افغانستان دننه نیول کېږي، بندیان کېږي، وژل کېږي؛ نو څنګه کېدای شي چې طالبان دې په پاکستان کې وي. د غزني، روزګان، هلمند او د نورو ولایتونو والیانو او امنیه قومندانانو په بیا بیا ویلي، چې طالب مشران په هر ولایت کې خپل وسله والو سره یو ځای د امریکا او افغان حکومت پر ضد جګړه کوي او د جګړې قومانده هم د دوی په لاسونو کې ده. نو بیا هم طالبان په پاکستان کې دي؟

زموږ د امنیتي ادارو مشران د امنیت د نه شتون له امله یوه میاشت او بله میاشت له خپلو کورونو نه راوځي؛ نو دوی به جګړه څنګه رهبري کړي او یا به د جګړې لومړۍ کرښې ته ورشي؟

افغان چارواکو ته پکار ده، چې د افغانستان اوسنۍ مسئلې ته د واقعیت له عینکو وګوري او بیا دې نور ګرم کړي. دلته فساد، زورواکي، پردي لاس پوڅي او نورې بلاوې په حکومت کې دننه شوي او د افغانستان پر ځای نورو ته کار کوي؛ نو دې کې حکومت ګرم دی او که بل څوک؟