(کابل ټکی کام، ۱۳۹۶، کب ۹) نن د چهارشنبې په ورځ سهار مهال په کابل کې د (کابل پروسې) دوهمه غونډ پيل شوه چې پکې به د سولې اړوند خبرې اترې وشي.
په دې غونډه کې د اته ويشت هیوادونو د بهرنیو چارو د وزارتونو معینان، د ملګرو ملتونو او ناټو سازمان پلاوي، د افغانستان لپاره د یو شمیر هیوادونو او سازمانونو ځانګړي استازي، لوړپوړي چارواکي ګډون لري او پکې به د افغان سولې او د تروريزم سره پر مبارزې اړوند موضوع بحث وشي.
تېره ورځ د ولسمشر غني د دفتر د ستراتيژيکو اړيکو او رسنيو مرستيال هارون چخانسوري وويل، چې دغه غونډه به په دوه برخو کې ترسره شي، لومړی چې له غرمې مخکې د سولې په تړاو ترسره کېږي د سولې عالي شورا مشر کريم خليلي به یې مشري کوي او دوييمه غونډه چې له غرمې وروسته کېږي د تروريزم سره د مبارزې پر اړوند موضوګانو بحث کېږي چې د افغانستان ملي امنيت شورا سلاکار حنيف اتمر په مشرۍ به پرمخ وړل کېږي.
ويل کېږي، د دغې غونډې په پايله کې افغان حکومت طالبانو ته د سولې اړوند يوه طرحه وړاندې کوي او پرون افغان ولسمشر اشرف غني په خپله رسمي ټويټر پاڼه ليکلي و چې (زه به د ملي وحدت حکومت په استازیتوب طالبانو او پاكستان سره د سولې تفصيلي پیشنهاد وړاندې کړم).
نن په ټول کابل کې عمومي رخصتي اعلان شوې او د ارګ شاوخوا ځينې مهمې لارې د ترافیکو پر مخ تړل شوي دي او امنيتي تدابير ټينګ شوي دي.
د افغان ولسمشر د عامه او ستراتېژیکو اړیکو د دفتر مرستیال محمد هارون چخانسوري پرون وويل، افغان حکومت طالبانو سره د سولې مذکراتو د پيل لپاره هيڅ ډول شرط نه لري او زياته يې کړه چې دا هغه ټکی دی چې د کابل پروسې غونډه کې به طالبانو ته وړاندې کېږي.
طالبانو تر اوسه د چارواکو د دغې څرګندونو او د کابل پروسې اړوند څه نه دي ويلي، خو تر دې مخکې يې په خپلو اعلاميو کې د مذاکراتو او خبرو اترو لوری امريکا ياده کړې او ويلي يې دي، چې روانه جګړه د امريکايانو له لوري پيل شوې او افغان حکومت د سولې اړوند هيڅ واک او اختيار نه لري، که د سولې اړوند خبرې کېږي بايد له امريکايانو سره وشي، نه له افغان حکومت سره.
بايد وويل شي، په روان کال کې د کابل پرسې دا دوهمه ناسته ده چې په کابل کې ترسره کېږي.
