«سرليکنه »
په نړيواله کچه دا مهال په زيات شمېر هېوادونو کې جګړو زور اخيستی دی. ځينې هېوادونه په خپلو منځو کې سره په سياسي اختلاف اخته دي او بيا يو شمېر هېوادونه د خپل منځي اختلاف سره سره وسله والې مبارزې ته ههم رسيدلي، چې د اروپايي هېوادونو په نسبت خليجي، اسياسي او اوسمهال عربي هېوادونو کې جګړو زور موندلی دی. د دې زور د مهارولو لپاره کمزورې هڅې هم په اسيايي او هم په عربي هېوادونو کې روانې دي خو په مقابل کې جګړې ورځ په ورځ زور مومي . د جګړو د زور موندنې او د سولې کمزوری اړخ دې سبب شي، چې اروپايي او نورو هېوادونوته د کډوالو بهير ورمات شي، چې دا مهال په نړيواله سطحه اروپايي هېوادونو ته د زوراخيستونکو جګړو له امله د سوريې او افغانستان کډوال ورمات شوي دي. ورځ په ورځ له مرګونو لارو په سختو شرايطو کې اروپايي هېوادونو پورې تر رسيدو مخکې يې خپلو هېوادونو ته د مرګ او په اوبو کې د ډوبيدو خبرونه ترلاسه کېږي.
د افغانستان د جګړې تاريخ په ټوله نړۍ کې روښانه دی چې تل جګړه زور وره او د سولې څرک نه ترسترګو کېږي. د کمونيستي رژيم ترنسکوریدا پورې که هرڅو د سولې ناکامې هڅې وشوې خو چې د سولې واک د افغانانو په لاس کې نه و ، ترپایه سوله رانغله او هېواد په کنډوالو بدل شو. تېره ورځ ولسمشر اشرف غنی په يوه خبري غونډه کې چې له اسلام اباده راستون شو ، ويې ويل: دا ځل راسره د پاکستان صدر اعظم ، امريکا، چين او هند په شریک څلور اړخيزو غونډو کې ژمنې کړي ، چې افغانستان ته به لازمي يعنې په سرعت سره سوله راولو او زور وره جګړه به مهار کوو. د مهار کولو څخه د اشرف غني موخه دا وه چې که کوم وسلوال له جګړې لاس نه اخلي او د سولې په بهير کې نه ورګډېږي ، په خلاف به يې شریک مقابل ګامونه پورته کوو. په يوه ورځ په ننګرهار او کابل کې مرګوني پېښې ، په کابل کې شيرپور سره په يوه بهرني ميلمستون او د اسپانيا په سفارت بريد دا وښودله چې کمزورې سوله دزور ورې جګړې په مقابل کې خپل منزل ته د رسيدا توان نلري.
اشرف غني وويل چې د امريکا ، چين ، پاکستان سره به د سولې په اړه څلور اړخيزې کميټې جوړېږي او د يوه چوکاټ تر جوړولو وروسته به پرې د عمل ګامونه اخلو ؛ خو خپله اشرف غني په کابل کې وليدل چې د کمزورې سولې د چوکاټ د مخه سره د ناهيلۍ چې د اسلام اباد اسيا زړه غونډې ته يې لرلې بيا په يوې داسې ناهيلۍ بدلې شوې ، چې د زورورې جګړې بې چوکاټه لارې به په کمزورې سولې په چوکاټ کې کابو نکړي شي.
