هسې په نوم مسلمانان

 آصف الله آصفی

الله تعالی څه ښه فرمایلي دی چې : یا ایها الذین آمنوا ادخلوا في السلم کافة. یعنی ای مومنانو په اسلام کې پوره پوره ننوځئ.
د خدای تعالی د دې حکم موخه داده چې صحیح مسلمان هغه دی چې په اسلام کې پوره ننوتی وي، داسې نه چې د اسلام ځینې احکام او اوامر چې د ده زړه یې مني او خوښیږي یې هغه مني او ځینې نور چې په طبعه یې برابر نه وي هغه ونه مني.
رسول الله ص فرمایلي دی چې : لا یؤمن احدکم حتی اکون احب الیه من والده و ولده و الناس اجمعین.
یعنې تر هغې تاسې پوره مومنان نشئ جوړیدای چې زما سره مه له خپل پلار، خپل اولاد او بالآخره له ټولو خلکو نه زیاته مینه او محبت ونه لرئ.
بل ځای کې هم الله تعالی فرمایی چې: قالت الاعراب آمنا قل لم تؤمنوا و لکن قولوا اسلمنا، و لما یدخل الایمان في قلوبکم.
یعني بانډه چیانو به ویل چې مونږ ایمان راوړی یعنی مومنان یو، ای پیغمبره ص ته ورته ووایه چې په حقیقت کې تاسي ایمان ندی راوړی، هسې په خوله وایئ چې مسلمانان یو، ستاسې زړونو ته هیڅکله ایمان ندی ننوتی.
زما هدف له دې آیتونو او حدیث شریف څخه دادی چې دې ځینو هسي په نوم مسلمانانو ته تعجب وړی یم، په ټولنیزو رسنیو کې چې د اردوغان خبر وویني چې بریالی شوی یا یې چا د اسلام، دین او مسلمانۍ په لحاظ د هغه طرفداری کړی، نو دا په نوم مسلمانان وایی، د پردیو خلکو صفت باندې څله ځانونه ستړې کئ، د خپل اشرف غني صفت ولی نه کوی، همداسې کله چې څوک د قدس په مسئله کې پر مسلمانانو ویر او غم ښکاره کوي، نو وایی زمونږ په خپل هیواد ولې ویر نه کوئ، زمونږ په هیواد کې د قدس له مسلمانانو زیات ظلم او جبر روان دی. بیا وایی چې د قدس خلک پردی خلک دی او د خپلو افغانانو غم په کار دی.
همدا راز چې څو ورځې وړاندې په جلال آباد کې سیکهان او هندوان په یوه چاودنه کې ووژل شول نو دغو هسې په نوم مسلمانانو پرې سخت ویرونه ښکاره کړل، او آن چې یو حدیث شریف یې دلیل هم وړاندې کړ چې : د معاهد وژل حرام دی.
خو بل پلو ته چې بیا په برما، فلسطین، سوریه، او داسې نورو هیوادونو کې پر مسلمانانو داسې ظلمونه کیږي چې په تاریخ کې ساری نه لري، بې د دې هسې په نوم مسلمانانو خولې بندې وې هیڅ هم نه وایی.
د دې نه په ډاګه معلومیږي چې د کفارو پر وژل کیدا ویر ښکاره کول او د مسلمانانو پر وژل کیدا خوله چوپه ول او یا ورته دا دلیل نیول چې ګوند هغه افغانان نه دی په مونږ پورې یې څه؟ هسې په نوم مسلماني ده.
ځکه چې الله تعالی فرمایل: اشداء علی الکفار رحماء بینهم. مسلمانان هغه څوک دی چې پر کفارو باندې سخت ګیر او پخپل مینځ کې مهربانه او د رحم څښتنان وي.
نو هر هغه څوک چې د اسلامي نړۍ او یا د ټولې نړۍ په ګوټ ګوټ کې پر مسلمانانو د ظلم کولو پر مهال بې اعتنایی ښکاره کوي او یا هغوی خپل وجود نه ګڼي، او برعکس که د نړۍ په هر ځای کې د کفارو پر وژل کیدا ژور خفګان ښکاره کوي، په خپل ایمان کې تجدید نظر ورکړی. او که غواړي مسلمان پاتې شي نو توبه دې وباسي او دا کلمه دې بیا له سره ووایی چې : لا اله الا الله محمد رسول الله.
زما هدف دا ندی چې ګوندې په افغانستان کې د سیکهانو او هندوانو وژل روا بولم، بلکې زما هدف دادی چې که پر دوی غم او غوصه ښکاره کوو، نو پر مسلمانانو د ظلم پر مهال باید لس چنده خفګان ښکاره کړو، نه دا چې بې اعتنایی وکړو. کنه نو بیا به هسي په نوم مسلمانان وو نه حقیقي مسلمانان.