عبدالله ګل
د لاندې څو لارو چارو په ترسره کولو سره کولای شو چې د خونې (کمرې) ګرموالی راټیټ کړو:
- د کړکۍ په بندولو سره لمر له خونې لیرې وساتئ، ځکه د کړکیو په پرانیستلو سره لمر مستقیما خونې ته ننوځي. د ورځې مهال د پردو بندول هم مه هېروئ، او کله چې ماښام خوا ته هوا لږ څه یخه شوه، وروسته یې خلاصې کړئ.
- ټولې برېښنايي آلې لکه کمپيوټر او ټلوېزون بند کړئ – که یې نه استعمالوئ. ځکه دا آلات ګرمي جوړوي. همداراز، د بلبونو (برېښنا ګروپونو) شمېر چې څومره کم وي، هغومره د خونې ګرمي کموي.
- له خونې اشپزخانه مه جوړوئ، (دننه خواړه مه پکې پخوئ.) اشپزخانه په کور کې تر ټولو ګرم ځای دی.
- د خونې د سړې ساتلو یوه بله لار دا ده چې د پنکې (پکه / پنکه) مخ ته په یوه کاسه کې یخ (واوره / یخی) کښېږدئ، چې په دې سره په خونه کې سړه هوا خپره شي.
- د خونې او یا کړکیو مخ او شاوخوا ته د ونو او بوټو کرل هم خونه له ګرمۍ ساتي. د ونو او جګو بوټو کرل له خونې د لمر بندولو اسانه لار ده.
- د دېوالونو سپین رنګ د ګرمۍ په کمولو کې مرسته کوي. همداراز، پر کړکیو سپینې پردې ځړول هم د خونې په سړوالي کې ګټه کوي.
