د ولسي جرگې د راتلونکو ټاکنو د روڼوالي پوښتنه بیا راپورته شوه. د ټاکنو کمېسیون وړاندې اعلان کړی و، چې راتلونکې ټاکنې به رڼې او له هر ډول درغلیو پاکې وي او په راتلونکو ټاکنو کې به نوماندان ښه چاڼ کېږي. دوی ویلي وو غاصبین، مجرمین، زورواکي، چورواکي او په فساد ککړ نوماندان پرېنږدي چې ولسي جرگې ټاکنو ته ودرېږي؛ خو د ولسي جرگې د نوماندانو له نوملړه داسې خلک هم ویستل شوي، چې هېڅ جرمي سابقه نه لري او داسې خلک پکې پرېښودل شوي، چې د افغانستان له لویې جغرافیې څخه منکر دي. لطیف پدرام، بهزاد او لسگونه نور کسان بیا د ولسي جرگې راتلونکو ټاکنو ته نوماندان دي. دوی هر کله د افغان له کلیمې منکر وو/دي. دوی ځانونه خراسانیان بولي او افغان پرې تپل شوې کلمه گڼي، خو د ټاکنو کمېسیون یې بیا هم پرېږدي او هغه خلک چې نسبت د دوی ته ښه دي، له لېسته ویستل کېږي.
ټاکنې په ټوله نړۍ کې سل په سلو کې پاکې نه وي او حتماً درغلي پکې کېږي. امریکا چې د دیموکراسۍ او بشر دوستۍ چیغې وهي، د ۲۰۱۶ د ټاکنو په اړه تراوسه پوښتنې او څېړنې روانې دي. امریکا ادعا کوي چې د دوی په ټاکنو کې روسیې لاسوهنه کړې او د ډونلډ ټرمپ په گټه یې کمپاینونه کړي دي. خو په حقیقت کې امریکایانو نه غوښتل چې د دوی پر سر دې ښځه ولسمشره وي؛ نو ځکه یې یو لېونی کس په ولسمشرۍ ومانه، خو هیلري کلنټن ته یې موکه ورنه کړه.
په افغانستان کې خو بیا د ولسمشرۍ، ولایتي شوراگانو او د ولسي جرگې ټاکنې هسې د وخت ضایع ده. د ولسمشرۍ د ټاکنو پایلې د امریکا په سفارت کې اعلانېږي، ولسي جرگې ته د ناټو د غړیو هېوادونو استازي راځي او ولایتي شوراگانې همداسې درواخلئ. د اوسنۍ ولسي جرگې اته کاله پوره شول، خو په تېرو اتو کلونو کې یې ټولې پرېکړې د شخصي گټو له پاره وې. نه د هېواد غم وخوړل شو، نه یې وړ وزیرانو ته رایه ورکړه، نه یې د امریکا پر ضد غږ پورته کړ، بلکې د څو تنو نه اخوا، نور ټول وکیلان په افغانستان د پردیو استخباراتي ادارو نارسمي استازي دي.
دوی په داسې بحراني حالاتو کې هم خپلې ژمنۍ او د دوبي رخصتۍ په پردیو هېوادونو کې تېروي. تل د لوړو امتیازاتو غوښتنه کوي او په دې فکر کې دي، چې څنگه یو وزیر سلب صلاحیت او له بل وزیر نه میلیونونه ډالر واخلي، چې رایه ورکړي. دوی د خپلو مؤکلینو سره د لیدنې پر ځای تل په بهر کې وي او افغانستان ته یوازې د گټې وټې په سترگه گوري او نوره کومه خواخوږي ورسره نه لري.
د ولسي جرگې د راتلونکو ټاکنو له نوملړه داسې خلک هم لرې شوي، چې د ۱۳۹۳ل کال په ټاکنو کې یې د اشرف غني پوره ملاتړ وکړ او تر پایه پر خپل دریځ پاتې شول. غني ته یې منډې ترړې ووهلې او تر وروستي وخته یې مبارزه وکړه. خو غني هغه شخص دی چې خپل ټول ملگري خوابدي کوي او د خپلې گټې د ترلاسه کولو وروسته یې په تش میدان پرېږدي.
زه په راتلونکو ټاکنو هېڅ باور نه لرم؛ ځکه د امریکا په موجودیت کې دلته ټاکنې هېڅ معنا نه لري او موږ دغه تجربه څلور کاله مخکې وکتله، چې خلکو رایې ورکړې، خو د ټاکنو پایلې د امریکا د بهرنیو چارو مخکېني وزیر جانکېري اعلان کړې.
اشرف غني زیاتې خبرې کوي، خو په عمل کې هېڅ دی. تېره ورځ مې د ده یوه ویډیو لیدله: دی په ډېره سپین سترگۍ وايي: زه د افغانستان د خلکو په رایو ټاکل شوی یم. په داسې حال کې چې د ده له حافظې د جان کېري پرېکړه وتلې ده او د ملي یووالي حکومت ډالۍ هم امریکا افغانانو ته د اشرف غني په لاس ورکړه.
د ولسي جرگې په ټاکنو کې به هغه څوک ټاکل کېږي چې لا وختي یې د بهرنیو سفارتونو هوکړه لیکونه ترلاسه کړي وي او په راتلونکې ولسي جرگه کې به د ډېرو کوچنیو هېوادونو رسمي استازي هم وي. خو که چېرې طالبان بریالي شول او راتلونکو ټاکنو نه یې مخکې خپل فعالیتونه ډېر کړل، نو د غني په ټولو ارمانونو به خاورې واوړي؛ ځکه په غزني کې چې طالبان څلور ورځې مقاومت کولی شي، نو هلمند خو په یوه ورځ کې نیولی شي.
د حکومت په داسې پرېکړو د خلکو باور ورځ تر بلې کمېږي او خلک نور هم د طالبانو خواته خپل تمایل ډېروي. اوس خلک پوه شوي چې غني یوازې خبرې کوي او د خپل واک د غځولو په فکر کې دی، خو په عمل کې له صفر سره ضرب دی.
