سرليکنه
وروسته له هغه چې د غزني ښار د پنځو ورځو جګړې په دوام د قاطع ملاتړ ماموريت په هوايي بمبار او عملياتو کې وسوځېد، د کابل ادارې وويل چې طالبانو پر غزني د يوه پلان له مخې جګړه پیل کړه چې د افغان طالبانو تر څنګ يو شمېر بهرنيو وسله والو هم د غزني په جګړه کې برخه درلوده.
د دفاع وزارت د همدې ادعاوو تر څنګ جمهور ریيس، اشرف غني، هم غزني ته سفر وکړ. هلته یې د قاطع ملاتړ ماموريت د عملياتو او د هوايي بمبار د قربانیانو له کورنيو سره د تېر په څېر د غمرازۍ پر مهال وويل: ”پاکستان له افغان دولت سره د ښه ګاونډيتو په ښوولو سره د امن او سولې د ټینګښت په برخه کې ځیني لیکونه لاسلیک کړي وو، خو تر اوسه پوري یې پر خپلو کړو ژمنو وفا نه ده کړې، چې ستره بېلګه یې د غزني وروستۍ جګړه ده.“
اشرف غني چې په غزني کې هر څه وويل پر هغه غزنيوال ښه پوهېږي چې حکومت له بهرنيانو پرته يوه ورځ هم نه شي پاتې کېداى. اشرف غني طالبانو او د طالبانو زور دواړه ته تسليم دى خو په ډاګه کوي یې نه. اما امريکا طالبان مني، خو په تېرو ١٧ کلونو کې یې د طالبانو زور او بريدونو ته د تسليم سر نه دی ټيټ کړی.
د غزني تر جګړې وروسته، د افغانستان د روانې جګړې او د طالبانو د پرېکنده بريدونو په اړه د امريکا دفاع وزير، جيمز مټيس، په يوه مطبوعاتي وينا کې ويلي چې ښایي طالبان د غزني تر جګړې وروسته د خپلو بريدونو په دوام سره د افغانستان د پارلماني انتخاباتو، چې ټاکل شوې د اکتوبر په میاشت کې وشي، مخه ونيسي.
که له افغان حکومت سره هر څو د امريکا په مشرۍ د ناټو هېوادونو پوځونه ملاتړ ولري، بيا هم د طالبانو پر وړاندې له ماتې سره مخ دى. که پر غزني ښار له بريد څخه د طالبانو هر هدف ؤ، ترلاسه یې کړ ځکه، د کابل د ادارې په وينا، طالبانو يوه مياشت دمخه پر غزني ښار پر بريد باندې کار کړی و. طالبان په خپل بريد کې کامياب شول.. له غزني یې ټول ساتونکي د بريد په لومړۍ ورځ تيښتې ته اړ کړل.
د امريکا دفاع وزير جيمز مټيس اوس هم اندېښنه لري، وايي چې د غزني ښار په کورونو کې طالبان پټ دي، که وسله ورته ورسېږي، د يو بل بريد امکان هم شته، او کېدای شي په غزني ښار کې هدفي وژنې ترسره شي، چې دا هدفي وژنې به پر ښار تر بريد ډيرې تاواني وي.
د افغانستان پر انجرې مشوړې او حل یې ډيرې ليکنې وشوې، خو دا چا څرګنده نه کړه چې ولې امريکا طالبان نه مني خو د طالبانو زور ته تر دې قانع دي چې په غزني کې به په کورونو کې ځای پر ځای شوي طالبان يا بل احتمالي بريد کوي او يا به په هدفي وژنو لاس پورې کوي، چې مخه یې د امريکا په مشرۍ د قاطع ملاتړ ماموريت هم نه شي نيولاى.
له جنرال مټيس سره دا وېره شته چې پر افغانستان د بهرنيو پوځونو د خيټې اچولو او ملکي او نظامي وګړو په بمبار له بهرنيانو څخه د افغان ولس نفرت زياتيږي او طالبان محبوبيت پيدا کوي.
سر له اوسه مټيس وايي چې که د غزني په څېر په نورو ولاياتو کې د طالبانو بريدونه دوام ولري، دا هم کېداى شي چې د لوی اختر د اوربند د له منځه وړلو ترڅنګ راتلونکې پارلماني ټاکنې هم په خپل وخت ترسره نه شي.
د جنوبي اسيا او افغانستان لپاره د ټرمپ نوې ستراتيژي يو کلنه شوه، خو پر افغان ولسي او نظامي وګړو له بمبار سره سره یې څه نتيجه ورنکړه.. او نه له افغانستانه د بهرنيو پوځونو د ایستلو مهالوېش وټاکل شو.
له امريکا سره همدا وېره شته چې که د بهرنيو پوځونو د وتلو مهالوېش وټاکل شي، طالبان چې هر څه وغواړي کولاى شي. همدا لامل دی چې امريکا طالبان نه مني خو د طالبانو زور مني.
