تبصره
د کورنيو چارو وزارت اعتراف کړی چې په کابل او ولاياتو کې د جنايي جرمونو په کنټرول کې ناکامه شوي دي، ورځ په ورځ د جنايي جرمنو په زياتوالي سره هدفي وژنې هم زياتې شوې دي او حکومت یې د مخنيوي په اړه هيڅ تدابير نه لري.
په دې وروستيو شپږو مياشتو کې په کابل او ولاياتو کې د جنايي جرمونو او هدفي وژنو زياتوالي د ولس ژوند دومره تريخ کړی چې په ټول هېواد کې د امن ځای نه ګوري چې ورکډه شي.
په همدې موخه د کورنيو چارو وزارت يو څه هڅې وکړې چې په کابل او ولاياتو کې له کورونو، دوکانونو، سرايونو، لويو لارو، موټرو- انسان تښتونو او په ډله ييزه توګه د غلو مخه ونيسي. خو په دې هڅه کې یې په خپله ناکامۍ په وار وار اعتراف وکړ، چې همدې اعترافونو د بې هدفه حکومت اعتبار نور هم پسې له منځه يووړ.
په افغانستان کې د حالاتو د څار له مخې دې نتيجې ته رسېږو چې وروسته به هغه پانګوال چې د امنيت د ښه والي په ډاډ یې پانګونه کړې ده له هېواد خپلې پانګې بيا بهرنيو هېوادونوته وباسي.
په افغانستان کې د بهرنۍ څار ادارې، سيګار، د راپور له مخې، سږ کال په هدفي وژنو کې ٣٥ سلنه زياتوالی راغلې دى.
که د سيګار په نوم د څار ادارې په خپل راپور کې نور دقت هم کړی وای ښايي د هدفو وژنو سلنه نوره هم لوړه ثابته شي، ځکه په کابل او ولاياتو کې په تېرو شپږو مياشتې کې د ولسي وګړو په وژنو کې ٧٨ سلنه زياتوالى ښوول شوی دى.
څه موده دمخه، د کابل په مکروريانو کې د ځانګړو پوځونو قوماندان د عزيزالله وژنه، بيا د کابل په خوشحال مېنه کې دوه مخکښو کسانو وژل، د زلمي وردګ وژل، دوه ورځې دمخه د کابل په خوندي سيمه کې د دوه پیلوټانو محبوب ساپی، محمد شاه احمدزي وژل، او همدارنګه په ننګرهار ولايت کې هدفي وژني دومره زياتې شوي چې نور په ښار دننه او بهر د ننګرهاريانو ژوند په امن نه دى.
په کابل کې د بې هدفه حکومت ستره ناکامي دا ده چې د پوځي، قومي، ديني، سياسي مشرانو، صرافانو او پانګوالو ماشومان له دې ويرې چې ونه تښتول شي له کورونو نه شي راوتلاى. او که د ننګرهار هدفي وژنو ته په پوره غور وګورو، ښايي نور اړخونه هم ولري، چې په هر صورت د کابل بې هدفه حکومت له يوه لوی خطر سره مخ دی او په دوام به یې يو شمېر نور وزيران هم استعفاګانوته اړکړي.
په دې وروستيو کې سره له دې چې د ننګرهار امن ځانګړو ځواکونو ته سپارل شوی خو بيا هم هدفي وژنو حکومت نور هم د بې هدفۍ په لور روان کړ.
د هدفي وژنو په مهارولو کې بې هدفه حکومت په بشپړه توګه ناکام شوی دی. اوس وېره دا ده چې له غزني وروسته د سرپل ولايت د طالبانو له احتمالي بريد سره مخ کېدونکی دی، چې ورځ په ورځ د بې هدفه حکومت د ناتوانۍ له امله په سرپل کې د طالبانو نفوذ مخ په زياتيدو دی او وسله وال طالبان د سرپل ولايت دروازې ته نږدې شوي دي.
