د افغانستان د جگړې اوولس کاله پوره شول او اتلسم کال یې روان دی. په دغه موده کې امریکا بېلابېل جنرالان په افغانستان کې په دندو وگمارل؛ خو له لومړي جنرال نیولې، تر پروني پورې ټول ناکام وو/ دي. ځکه هر نوی قومندان له یوه لمن ژمنو سره راغلی، خو وروسته یې بېرته خپله ناکامي منلې ده او دنده یې پرېښې ده.
پرون په افغانستان کې د امریکايي او ناټو ځواکونو نوي قومندان جنرال اوسټن سکاټ مېلر د جنرال جان نیکلسون پر ځای نوی دنده پیل کړه او امریکا فکر کوي، چې دی به د افغانستان جگړه یوه طرفه کړي او آن کله ـ کله خو امریکايي سناتوران او پالیسي جوړونکي د افغانستان د جگړې د گټلو خوبونه هم ویني. خو دوی د افغانستان له تاریخ او د افغانانو له مېړانې خبر نه دي، چې په تېرو اوولسو کلونو کې دوی آن په بگرام کې هم ارام خوب نه دی کړی.
واشنگټن پوسټ ورځپاڼې لیکلي وو، چې سکاټ مېلر به د جگړې ترڅنگ په افغانستان کې د سولې ډیپلوماسي هم پرمخ بیايي او کېدای شي روانې جگړې ته د پای ټکی کېږدي او دغه اوږده جگړه پای ته ورسوي.
جنرال نیکلسون په ۲۰۱۶ز کال کې د خپل نوي ماموریت پر مهال ویلي وو، چې دی به هغه سیمې بېرته له طالبانو ونیسي، کومې چې اوسمهال د دوی تر واک لاندې دي. خو په دوو کلونو کې طالبانو د خپل تر واک لاندې سیمې نورې هم پراخه کړي او تر واک لاندې د خاورې سلنه یې ۷۲ ته پورته کړه.
د امریکا ولسمشر ډونلډ ټرمپ هم د جنرال نیکلسون له فعالیتونو راضي نه و، نو ځکه یې پر ځای سکاټ مېلر وگماره. داسې اټکل کېږي چې دی به هم د نورو امریکايي قومندانانو په شان یوه ورځ په خپله ناکامۍ او ماتې اعتراف وکړي او امریکايي پالیسۍ جوړونکو ته به ووايي، چې د افغانستان جگړه نه شو گټلی.
د امریکا په تاریخ کې د افغانستان جگړه تر ټولو اوږده جگړه ده او امریکا هره ورځ د یوې نوې ناکامۍ سره مخ کېږي. د ناټو او امریکايي جنرالانو ژر ادلون ـ بدلون د دې خبرې ښکاره څرگندوی دي، چې دوی ناکام شوي او داسې پلمه په لاس نه ورځي، چې نور خپلې پښې سپکې کړي.
افغان دولت له لومړي سره د طالبانو د هر برید تر شا د پاکستان لاس ښوده؛ خو له تېرو دوو کلونو راهیسې امریکا په افغانستان کې د طالبانو د هر برید وروسته روسیه او چین ملامتوي. پرون د امریکايي ځواکونو گوښه شوي قومندان جنرال نیکلسون هم وویل، چې روسیه په افغانستان کې د امریکا او ناټو له لوري د روانو پرمختگونو مخه نیسي او آن د ناکامولو هڅه یې کوي. خو دوی نه وايي، چې د امریکا او ناټو پر وړاندې روانه جگړه افغاني ده او د افغانستان ازادي د ټولو افغانانو مسوولیت دی او د دغه مسوولیت په ترسره کولو کې«طالبان» له هېچا ډار او ورته اړتیا نه لري.
که امریکا خپله پالیسي همداسې پرمخ یوسي او د سولې هڅې ونه کړي، نو نږدې وخت کې به واورئ، چې سکاټ مېلر هم له دندې بېرته گوښه شو او په افغانستان کې یې د امریکا پر ماتې منښت وکړ.
