لس جواهر

ژباړه: محمد نبي (الدين)

لومړی جوهر :

اودس، لمونځ، صدقه او د نورو مسلمانو د مشکلاتو د حل په لټه وتل د هر مرض لپاره تر ټولو کاميابه دارو درمل دي.

دوهم جوهر :

له خپلي سينې څخه دي د حسد اور، و ټولو خلګو ته په عامه بخښني و وژنه.

درېيم جوهر :

پر خپل رب “جل جلاله” د ښه ګمان په دسمال خپلي اوښکي پاکي کړه ، د الله د نعمتونو د ياد په زور خپل غمونه وشړه.

څلورم جوهر :

دا دي اورېدلي، چي خفګان هغه څه بېرته را وړي کوم چي تللي وي او غم هغه رغوي کوم چي خراب سوي وي؟ نه.. نو خفګان او غم د څه لپاره؟!

پنځم جوهر :

دا دنيا د هيچا لپاره تلپاتي نه ده پاتي سوې، په دنيا کي د هيچا ټولي غوښتني نه دي پوره سوي او نه څوک د دنيا له دردونو خلاص سوي دي.

شپږم جوهر :

داسي اوسه لکه د خرما درخته لوړ همت او قامت، له ضررونو خلاص، کله چي په ډبرو وويشتل کيږي، له هاخوا ورته خوږه خورما را لږېږوي.

اووم جوهر :

نېکفالي کوه .. الله “جل جلاله” ستا سره دی ، ملائکي درته بخښنه غواړي ، جنت درته انتظار کوي.

اتم جوهر :

د تکليفونو او فتنو انتظار مه کوه، بلکي د امن او سلامتيا او عافيت انتظار کوه.

نهم جوهر :

پر ضعيفانو رحم وكړه؛ خوشحالي به تر لاسه کړې، د محتاجانو سره مرسته وکړه؛ شفاء به تر لاسه کړې، په سينه کي بغض مه ساته عافيت به تر لاسه کړې.

لسم جوهر :

دا ياد ولره، چي ستا رب “جل جلاله” هغو ته بخښنه کوي څوک چي بخښنه غواړي، د هغو توبه قبولوي څوک چي توبه باسي.

خير وکړه تر څو مېوه يې ټوله کړې

موږ به لاړ سو اثر به مو پاته وي