نعمان لطیف
اتلسم کال شروع دی چې طالبان دغربي تاړاک پر ضد په وسله وال مقاومت لګیا دي. تر ډېره دطالبانو دمقاومت مځکې کلیوالي دي او اوس کابو ټولې دحکومت له تسلط وتلې بویه.
له کلیوالو سیمو دکابل د واک ختل او دطالبانو دمقاومت سیمې ګرځېدل په دې مانا دي چې طالبان دهمدغو کلیو او بانډو خلک دي او له خپلو کورونو، او کلیو ئې دغربي تاړاکګرو پر ضد مقاومت پیل کړی دی
امریکا او صلیبي حلفاؤ ئې زموږ پر مځکه مستقیم یرغل راوړی دی. په پرمختللو وسلو سنبال زموږ هېواد ته راغلي دي او زموږ پر خاوره او هېوادوالو زرګونه کیلو ګرامه بمونه اوروي.
امریکایانو ته د افغانانو دکور، کلی، ګودر او بانډې لاره زموږ خپل افغانان ورښیي چې بیا ئې امریکایان د همدوی پر غوښتنه له منځه وړي
دوی چې د نړۍ هیڅ قانون او آن مفکر هم د بادار او غلام له رشتې علاوه بل نوم نشي ورکولای او طالبان چې دنړۍ د هر قانون له مخې ئې مقاومت برحق دی، او د ازادۍ اخیستلو لپاره له هر چا دمرستې غوښتلو شرعي جواز هم لري؛ دلته غلامان باله شي او دکابل غلام نظام ته د خپلواک نظام خطاب کیږي
طالبانو په ۱۷ کلونو کې عملا ثابته کړې ده چې دهیچا تر تسلط لاندې نه دي، نه دچا نفوذیان دي نه یې واګې دپردیو په لاسونو کې دي مګر بیا هم مخالف جهت تکراراً پر دې شخوند وهي چې ګواکې طالبان دپنجاب غلامان دي او …….
په ۱۷ کلونو کې د نړیوالو استخباراتي شبکو تجربه کار او مسلکي ځرو هیڅ کوم مستند شواهد پیدا نشوای کړی چې له طالبانو سره دپنجاب مرستې تائید کړي
طالبانو سره دپنجاب دمرستې او نفوذ په اړه ټول شواهد هغه دي چې په ګوګل او نړیوالو دجالي رسنیو کې موندلای کیږي
دغه کمزوري لاسوندونه دغرب دکرایه شویو لیکوالانو له اړخه ځای پر ځای شوي افواهات دي چې دطالبانو خلاف دمستندو شواهدو پر توګه راوړل کیږي.دا په داسې حال کې ده چې رسنۍ او دګوګل معلومات نړۍ کې منحیث ثبوت، قانوني ثبوتونه نشي ګرځېدلای
دکابل ادارې په زندانو کې تر شلو زرو زیات طالب زندانیان پراته دي؛ دطالبانو لیکو کې که پنجابیان جنګیږي، دغه شل زره څوک دي؟!
دوی که پنجابیان وي رسنیو ته ولې نه وړاندې کیږي؟ او که افغانان وي بیا نو حکومت افغان دښمنه دی او د افغانانو د ربړولو او وژلو دنده ورکړل شوې ده
تر شلو زرو زیات ئې شهیدان ورکړي دي؛ دوی کې هغه پنجابیان څه شوه چې دطالبانو لیکو کې جنګېدل او ووژل شوه؟!
که د اشرف غني په هغه موشنداره وینا دلیل نیسو چې وایي《 عمران خانه! جنازې درورسېدلې، اتي نو بس کړه》دا به داسې وي لکه د اشرف غني یا عبدالله اولادونه چې کابل ته راشي، دلته په کومه چاودنه کې ئې خدای له ژوند محروم کړي او لبنان یا امریکا یا هند ته دتدفین لپاره یوړل شي، او طالبان چیغې پورته کړي چې: نرېندر مودي! جنازې ……..
روانه جګړه کې د طالبانو لسګونه برجسته قومندانان او والیان په شهادت رسیدلي دي چې ډېر ئې په چاپه، یا بمبار کې ټارګټ شوي دي؛ که په لیکو کې ئې پنجابي جنرالان جګړه کوي ولې نه په نښه کیږي؟
دوی ته که ووایو “هاتوا برهانکم” کره شواهد مو راوړئ؟!
سترګې مړې ونیسي. زه خپله نه پوهېږم مګر فلان صیب وویل او هغه له فلانکي تلوېزیون اورېدلي و، په فلانکی رسنۍ کې ئې لیدلې و.
غني چې واک ته ورسېد، په لومړیو ورځو کې ئې اسلام آباد ته خورا تاودې منډې ترړې پیل کړې. پلویان ئې انګک بنګک کېدل او سپېږمې یې شتۍ شتۍ کولې، ته وا طالبان یې ختم کړه او له پنجاب ئې د واک دائمي قباله ترلاسه کړه، درحالیکې د غني منډې سازشي وې او پنجاب ته په نورو امتیازاتو ورکولو سربېره د ډیورنډ لانجمنه کرښه ئې هم تسلیم کړه
پس له دې طالبانو ته هیڅ نه ده پکار چې له چا سره پر دې سر وخوږوي چې ګواکې طالب دپنجاب غلام دي یا نه؛ نور نو دا سولېدلی او کلیشه منطق بس دی، نړۍ ولیدل چې طالبان دتالار دننه ناست دي او دکابل ادارې دواړه وفدونه تالار ته پرېنښودل شوه، خړمخونه له هغه ځای راوشړل شوه او امریکایانو نېغ په نېغه له طالبانو سره مذاکرات پر مخ یوړل؛ که چېرې طالبان غلامان وای لکه دکابل وفد له تالار به بهر کښېنول شوی وای.
که دکابل بلواکه اداره له زړه پر دې قانع نه وي چې ګویا طالبان خپلواک دي، بد کوي دناستې چیغې ورته وهي، دا نو ولس ته له دوکې ورکولو علاوه بله مانا نه لري
طالبان وایي دکابل اداره بلواکه او غلامه ده، د غلام سره مذاکرات د وخت ضیاع ده او پر خپله دعوه ثابت قدم دي. کابل که خپله دعوه کې صادق وي دغني د واکمنۍ د لومړیو ورځو په څېر دې په پنجاب پسې ځغلي، طالبانو ته ولې منتونه کوي چې ومو منئ، راسره کښېنئ او صلحه راسره وکړئ؟!
دکابل اداره د امریکایانو په اشاره دپنجاب پر ټاپه د افغان مسلمان ولس پر ضد پیل کړې ناروا صلیبي جګړې ته مشروعیت پیدا کوي،په همدې بهانه د مقاومت کمزورې کولو هڅې کوي او خپلو عسکرو ته جګړئیزه روحیه ورکوي
که له دوی دپنجاب ټاپه واخیستل شي، دوی خپل حیثیت او دجګړې چالو ساتلو لپاره د سون توکي هم له لاسه ورکوي، چې ورسره سم به افغان مسلمان ملت دتاړاکګرو او افغان ملګرو په خلاف ئې د “حي علی الجهاد” په نعره کوتکونو ته لاس کوي.
