تميم توفيق
له کله نه چې د امريکا زور اوبه کيدل پيل شوي، د طالبانو پوځي او دپلوماتيک قوت اضافه شوی او دغه راز د کابل ادارې هر رنګه حکومتي توان منفي صفر درجې ته ټيټېدونکی دی، چې د ډيرو له نظره، که روان حالت همدغسې روان وي، ممکن امريکا بې له چون او چرا خپل افغان انډيوالان يوازې پرېږدي چې په پايله کې به دولتي منسوبين لکه د پخوا په څير په يوه او بله وتښتي او واک به يو ځل بيا طالبانو ته پاتې شي.
همدا روان وضعيت نور د ځان په ګټه اړولو په نيت طالبانو په دولتي نظامي ځواک خپلو بريدونو ته خورا زور ورکړی او هره ورځ يې په داسې بې دريغه توګه وژني چې اوس يې کابل اداره د پوځي ځواک له قحط سره مخامخ کړې ده.
څه موده وړاندې د دولت د جلب او جذب مسؤلينو هم رسنيو ته شکايت کړی و چې عسکر يې ډير تلف کيږي او ګڼ يې له دندو تښتي، خو بالمقابل په نظامي ليکو کې د ثبت نام پروسه يې په ټپه ولاړه ده، چې د دوی په يقين که حالت همدغسې دوام وکړي، نظامي ځواک به يې ډير ژر نشت شي.
له دې علاوه څومره عسکر چې د طالبان د بريدونو په پايله کې وژل کيږي، د هغو دوه چنده يې د طالبانو د دعوت او ارشاد کميسيون له لوري د دوی ليکو ته جلبيږي او ډيری يې عادي ژوند ته ګرځي.
دغه راز زيات شمير عسکر د طالبانو د رسا بريدونو له امله له پوستو تښتي او هم تسليميږي. همدا وجه ده چې کابل اداره له نظامي قحطۍ سره مخ کيدونکې ده.
د طالبانو لخوا د دولت نظامي ځواک ته زياته توجه او د عسکرو په بې دريغه وژلو سره د دولتي نظامي قوت د له منځه وړلو هڅه د دې سبب شوې چې دولت هم بالمقابل په طالبانو شپنۍ چاپې زياتې کړي او د طالبانو پوځي ځواک کمزوری کړي.
خو له هغې ورځې چې دولت شپنۍ چاپې پيل کړې دي، موږ وينو چې د ټولو په پايله کې ملکي وګړو ته زياته مرګ او ژوبله اوړي او طالبانو ته يې هڅ نوع زيان نه دی رسولی، بلکې لا يې ولس د طالبانو پر لور مات کړی دی.
څه موده وړاندې په کونړ، بيا په خوست، غزني، ننګرهار، هلمند او ارزګان او ابله ورځ په زرمت کې وحشيانه چاپې ووهل شوې، چې ټول پکې ولسي وګړي تلف شول او حتی چاپه مارو عسکرو د کليوالو په نقليه وسايطو سربېره سلامتې کلاګانې د اور خوراک کړې او په نارينه وو علاوه يې ښځې او ماشومان هم په خورا بې دردۍ سره په شهادت ورسول.
دولتي عسکر چې له کله نه د طالبانو لخوا له مرګونو بريدونو سره مخ شوي، ولس د اشرف غني د عسکرو له لوري په بې رحمانه ډول قتل عام کيږي او دا لړۍ لا هم روانه ده. نه پوهيږو چې اشرف غني له دې وحشيانه شپنيو چاپو څخه د کومې ګټې تر لاسه کول په نظر کې نيولي دي.
خو اشرف غني او اداره يې بايد وپوهيږي چې د طالبانو له لوري د عسکرو بې درېغه وژنه د طالبانو کاميابي سل سلنه يقيني او حتمي کوي او د دوی له لوري ولسي قتل عام او مالي زيان رسونه به بې له شکه د دوی د ماتې او د ولس په وړاندې د تلپاتې خجالت او رسوايي سبب ګرځي.
تاريخ ثابته کړې چې په دې ولس هيڅکله زبرځواک او ظالم پاچا حاکميت نه دی کړی، بلکې په دې غيور او په دين او وطن مين ملت هغو خلکو حاکميت او بادشاهي کړې ده چې د دوی زړونه يې ګټلي او تل يې ځان د دې ولس جزء بللی دی، چې هغه په نن سبانيو سياسيينو کې طالبان دي او بس.
