(کابل ټکی کام، ۱۳۹۸، غبرګولی ۱۲)
تيره شپه ناوخته د غزني ښار مربوط د پوليسو په ريزرف ځانګړې قطعه د طالبانو له خوا موټربم حمله وشوه چې ګڼو عسکرو ته پکې مرګ ژوبله واوښته.
ځايي سرچينې وايي، چې طالبانو بيګا له ماسختن وروسته د لس بجو په شاوخوا کې د هاموي ټانګ په وسيله دغه بريد کړی چې له چاوديدونکو توکو يې ډک کړی و او د ريزرف د پوليسو پر قوماندانۍ يې بريد وکړ.
د غزني د والي وياند عارف نوري د بريد د تاييد تر څنګ وويل، چې پوليسو ته تلفات اوښتي خو د کره شميرو په اړه يې معلومات نه دي ورکړي.
له سيمې څخه یوې امنيتي سرچينې کابل ټکی کام ته د نوم نه ښودلو په شرط ويلي په دغه موټربم چاودنه کې د ريزرف قطعې اته عسکر وژل شوي او اووه تنه نور مرګوني ټپيان شوي دي.
تر اوسه هم حکومتي سرچينو د پوليسو د تلفاتو وروستي ارقام نه دي خپاره کړي.
طالبان چې د بريد مسؤوليت هم مني وياند يې ذبیح الله مجاهد وايي، چاودنه چې د هاموي ټانګ په وسيله د ريزرف قطعې پر عسکرو ترسره شوې پکې تر څلويښتو پورې عسکر وژل شوي، ګڼ شمير نور ټپيان دي او د قطعې ودانۍ زياته برخه نړيدلې ده.
