(کابل ټکی کام، ۱۳۹۸، غبرګولی ۱۳)
د درملو لوړ قيمتونه خو به مو ليدلي وي خو تازه یوې امريکايي کمپنۍ داسې درمل تيار کړي چې د نړۍ په سطحه تر ټولو زيات قيمتي له شل لکه ډالرو څخه زيات قيمت لري چې تقريباً ديرش کروړه پاکستانۍ کلدارو نه هم زیات تماميږي.
دغه درمل چې زولجينسما نوميږي د امريکا نووارټس کمپنۍ له خوا جوړ شوي او د يوه ځانګړې ناروغۍ “اسپائنل مسکيولر ايړوفي” چې په نویو زيږيدلو کوچنيانو کې پیدا کيږي د مخنيوي لپاره کارول کيږي.
یادې ناروغۍ ته “ايس ایم ای” هم ويل کيږي چې د روغتياپالانو په وينا یوازې په امریکا کې د کال ۵۰۰ نوي زيږيدلي کوچنيان د دغه مرض سره دنيا ته راځي.
دغه درمل دوه کلن عمر لرونکي کوچني او یا له دې کم عمره کوچني ته ورکول کيږي او په یوه ساعت کې یاد درمل جسم ته داخليږي.
اسپاينل مسکيولر ایړوفي ناروغي د یوه خراب جين له امله په کوچني کې پيدا کيږي چې له کبله يې ماشوم خوراک نه کوي، هډوکي او بندونه يې کمزوري او ساه په سختۍ اخلي.
یاده ناروغي په هډوکو حمله کوي او تقريباً نوي فيصده کوچنيان د دوو کلونو په موده کې یا مړه کيږي او یا کوم ماشومان چې له مرګه بچ پاتې شي هغوی ټول عمر په فالج تيروي.
د درمل جوړوونکې کمپنۍ وايي، دغه درمل به راتلونکې مياشت عام بازار ته وړاندې کړي خو دا چې نوموړي درمل ډير زيات قيمتي دي نو د کمپنۍ والا يې چې د بې وسه خلکو لپاره ورکوي خو پیسې به يې په قسطونو خلاصوي.
دوی وايي، که څوک د یادو درملو اخيستل غواړي نو په پنځو کلونو کې يې بايد پيسې غوڅې کړي، داسې چې په لومړي ځل به اووه لکه او پنځوس زره ډالره ورکوي او په راتلونکو کلونو کې به هر کال درې لکه ډالره کمپنۍ ته ورکوي تر څو ټولې پيسې يې پوره شي.
