کابل ټکی کام (پنجشنبه ، ۱۳ چنګاښ ، ۱۳۹۸ل)
مشهورې ورځپاڼې واشنګټن پوسټ د قطر دفتر مذاکراتو ته کتنه کړې او دځینو منابعو له قوله یې یوشمېر جزیات خپاره کړي.
ورځپاڼې د نږدې کسانو له خولې لیکلي، چې طالبان او امریکا دامهال د بهرنیو ځواکونو د وتلو د مهالوېش پر سر د یوه توافق پر لیکلو بحثونه کوي.
دغه سرچینې د نامه نه ښودلو په شرط ویلي چې په توافق کې به د بهرنیو ځواکونو د وتلو پر مهالوېش او د ترهګرۍ پر ضد مبارزې موارد موجود وي.
دوی ددغه توافق د طرحې لیکل پيل کړي دي خو تر دې دمه پر اختلافي مواردو بحث روان دی اوژر ده چې یوې حل لارې ته سره ورسېږي.
داسې هم ویل کېږي چې امریکا د بهرنیو ځواکونو د وتلو لپاره د ډېر وخت غوښتنه کوي خو طالبان بیا ژر ددغه سرتېرو د وتلو غوښتونکي دي.
سرچینو زیاته کړې، دواړه لوري هڅه کوي د دوحې د بین الافغاني مذاکراتو تر پیل مخکې پر دغه دوو مواردو هوکړې ته سره ورسېږي.
بلې خوا بیا مشهورې قطرۍ رسنۍ الجزیرې خبر ورکړی چې په روانو مذاکراتو کې دامریکایانو او طالبانو خبري ۸۰ او یا ۹۰ فیصده تمامي شوي دي.
الجزیره د طالبانو دویاند سهېل شاهین له قوله ویلي،«موږ پدې روانډ خبرو کي حیرانونکی پرمختګ کړی دی. او د سولي د موافقې اتیا او یا نوي فیصده کارونه فیصله شوي دي.
